Prezidente Repúblika, Francisco Guterres ‘Lú-Olo’ halo enkontru Governu hodi diskute kona-ba movimentasaun iha porta entrada, kinta (10/09) iha Palásiu Prezidensiál Nicolau Lobato, Bairro Pite, Imajen Tatoli/Egas Cristovão

DILI, 10 setembru 2020 (TATOLI)-Prezidente Repúblika, Francisco Guterres ‘Lú Olo’ husu ba Governu atu kontinua asegura fronteira terrestre no aeroportu ho medida rigór atu prevene propagasaun COVID-19 mai iha Timor-Leste.

Xefe Estadu hato’o kestaun ne’e hafoin konvida Primeiru-Ministru, Taur Matan Ruak, akompaña hosi Vise Primeiru-Ministru no Ministru  Planu no Ordenamentu, José Maria dos Reis, Ministru Defeza, Filomeno da Paixão de Jesus no Ministra Negósiu Estranjeiru no Kooperasaun, Adaljiza Magno iha Palásiu Prezidensiál Nicolau Lobato, Bairro Pité.

“Prezidente Repúblika konvida Primeiru-Ministru ho membru Governu sira, hodi ko’alia no diskute kona-ba asuntu fronteira terrestre no aeroportu ne’ebé ema kontinua tama no sai ilegál no bele fó risku ba transmisaun COVID-19 ba soseidade Timor-Leste,” tenik Xefe Kaza Sivíl Prezidénsia Repúblika, Francisco Maria de Vasconcelos, kinta ne’e. 

Notísia Relevante: Governu deside loke fronteira loron-17 dala ida

Nia haktuir, iha enkontru ne’e diskute oinsá atu prevene kontrola movimentu ilegál atu labele lori risku ba territóriu nasionál.

Xefe Kaza Sivíl Prezidénsia Repúblika, Francisco Maria de Vasconcelos.Imajen Tatoli/Egas Cristovao

“Ita hatene sira ne’ebé maihosi dalan ilegál dala ruma lori moras iha isin. Tanba ne’e, Prezidente Repúblika preokupa ho situasuan ne’e  hodi konvida Governu sira mai diskute hodi tau atensaun ba fronteira sira atu ita bele prevene pandemia globál ne’e,” nia akresenta.

Francisco Maria de Vasconcelos esplika, iha enkontru ne’e Xefe Estadu husu ba Governu tau-matan no asegura porta entrada atu ema sira ne’ebé tama-sai tenke buka tuir hodi tau iha konfinamentu obrigatóriu, tanba ne’e Governu halo ona kompromisu atu foti medida rigór.

“Atu nune’e ita bele impoin regra ba ita-nia sidadaun rasik tanba sei ita tolera ema ida ka rua, bele fó impkatu boot ba ita-nia sosiedade tomak liuliu sira iha fronteira,” nia subliña.

Estadu Emerjénsia dalimak hahú hosi tuku 00:00 iha 05 setembru 2020 no sei termina iha tuku 23:59 iha loron 4 outubru 2020, iha territóriu nasionál tomak hodi suspende direitu balun ho parsialmente hanesan: 

Dahuluk, ba sirkulasaun internasionál, sei estabele kontrolu sanitáriu iha portu, aeroportu ka postu fronteira terrestre, atu impede moras ne’e tama mai territóriu nasionál ka kondisiona observánsia kondisaun nesesáriu hodi evita risku propagasaun epidemia, nune’e mós toma medida nesesária asegura sirkulasaun internasionál ba bens no serbisu esensiál sira.

Daruak,  ba liberdade sirkulasaun no fixasaun rezidénsia ba kualkér pontu iha territóriu nasionál sei lidera hosi autoridade públika sira hodi bele redús risku kontájiu no ezekuta medida prevensaun no kombate epidemia, inklui konfinamentu kompulsivu domisíliu. 

Ikus liu, direitu rezisténsia, kualkér aktu rezisténsia ativa ka pasiva hosi autoridade públika kona-ba ezekusaun Estadu Emerjénsia.

Razaun husu revonasaun deklarasaun Estadu Emerjénsia tanba Timor-Leste geografikamente besik Repúblika Indonézia ne’ebé rejista ona mais 160.000 kazu kofirmadu COVID-19 no ema na’in-7000 resin mak mate hosi provínsia 34 iha territóriu Indonézia nian inklui provínsia viziña Timor Osidentál (NTT-Nusa Tenggara Timur). 

Nune’e mós, nasaun viziña Austrália ne’ebé rejista ona kazu infesaun 25.000 konfirmadu no ema na’in 600 mak mate ona.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here