Jogador klube SLB joga hasoru Kablaki FC iha Kopa FFTL iha Estadiu Munisipal Dili.Imajen Midia FFTL.

DILI, 09 setembru 2020 (TATOLI)-Klube Jigante ho naran istimadu Makikit Laulara ne’ebé koiñesidu ho AD.SLB konsege halakon ninia adversáriu Kablaki FC ho eskoru 4-0 iha jogu kontinua Kopa Federasaun Futeból Timor-Leste (FFTL) époka 2020 iha Estádiu Munisipál Dili, kuarta ne’e.

Golu vitoria SLB nian prodúz husi jogadór João Pedro ho númeru kamijola (7) iha minutu 12, iha minutu 33 jogadór Martinho da Costa (2) hatama tan golu ba baliza Kablaki.

Notísia Relevante :FFTL Realiza Kopa 2020 ho Osan Rihun $ 200

Iha minutu 63 jogadór Mozinnho de lima (10) kontinua hatama tan golu ba baliza Kablaki no Cornelio Portela (11) hatama golu ida ikus nian iha minutu 69.

Jogu ne’e direje husi árbitru Francisco Pereira Juiz Liña António de Carvalho, João Paulo de Jesus no árbitru rejerva Vicente Alves.

Maski derrota, Treinadór Prinsipál Kablaki, João Fernandes, ho fiar aan hateten maski lakon maibé sei iha oportunidade lori ninia klube hakat ba jogu oitavu finál.

“Jogu ne’e kapas. Ha’u satisfaz tanba SLB la’ós klube ida ne’ebé fasil mesak ho jogadór selesaun nasionál de’it maibé la manán ami ho golu barak, oportunidade sei iha tanba ami nia pontu hanesan ho Boavista FC Timor,” nia dehan.

Iha fatin hanesan, treinadór SLB, Efren dos Santos, sente kontente ho rezultadu ne’ebé iha tanba posibilidade hakat ona ba oitavu finál

“Sente kontente, iha ona oportunidade hakat ba oitavu finál,” nia reforsa.

 Notísia Relevante :Hatrick Garcia lori Ponta Leste manán Ultramar 4-1

Jornalista : Hortencio Sanchez

Editór      : Agapito dos Santos

HAKEREK NO HATÁN

Please enter your comment!
Please enter your name here