Jornalista Agência Tatoli, Eugénio Pereira halo entrevista Komandante Polísia Munisipiu Liquiça, Superintendente Umbelina dos Santos Soares. Imajen Tatoli/António Gonçalves

LIQUIÇA, 10 setembru 2020 (TATOLI)- Komandu Polísia Nasionál Timor-Leste (PNTL) Munisípiu Liquiça liuhusi Ofisiál Polísia Suku (OPS), daudaun ne’e, implementa hela programa “Harii Dame” ba grupu juventude no grupu organizasaun arte marsiál (GAM)  no arte rituál sira atu bele garante paz.

Komandante Polísia Munisípiu Liquiça Superintendente Umbelina dos Santos Soares, deklara programa ne’e sira hala’o hodi bele redús kazu krime ne’ebé envolve grupu juventude no GAM iha area jurisdisaun Liquiça.

Superintendente Umbelina rasik foin simu pose husi Komandante Jerál PNTL, Komisáriu Faustino da Costa, hodi hala’o knaar foin fulan rua ho balun hodi aprezenta programa Harii Dame ne’e hetan apoiu másimu husi autoridade suku, veteranu,  igreja no sosiedade sivíl sira.

“Hafoin simu pose, ha’u mai koordena kedas ho komandante postu no Ofisiál Polísia Suku (OPS) oinsá ami tun direta ba povu hodi sosializa programa “Harii Dame” hodi bele lori povu liu-liu juventude no GAM sira atu servisu hamutuk lori pas no moris hakmatek ba too postu administrativu sira too suku no aldeia sira iha Liquiça,” hateten Komandante Umbelina ba Agência Tatoli, ohin, iha Suku Loes-Liquiça.

Nia dehan, bainhira povu moris hakmatek sei fó benefísiu ba ema hotu-hotu atu hala’o servisu ho di’ak hodi kontribui ba dezenvolvimentu iha Liquiça Vila, Postu Administrativu Bazartete no Postu Administrativu Maubara.

PNTL Liquiça rasik servisu hamutuk ho autoridade suku mós re-íntegra  ona komunidade sira ne’ebé sai vítima ba konflitu iha Bazartete no sira fila ona ba sira nia hela nafatin.

“Ita nia populasaun sira ne’ebé uluk mai hela iha Komandu PNTL Liquiça mós re-íntegra fila fali ona ba sira nia hela fatin. Ha’u rasik halo vizita ba populasaun sira nia fatin hodi hala’o diálogu ho sira oinsá kria nafatin pas atu labele hamosu tan problema ruma,” nia hateten.

PNTL mós koordena ho lideransa GAM sira hanesan, PSHT, Kera Sakti no KORKA no Grupu Arte Rituál 77 iha Maubara Lisa, no Suku Ulumera no suku seluk tan atu sai autór no na’in ba pas.

Daudaun situasaun seguransa iha suku no aldeia sira la’o hakmatek nafatin no seidauk mosu perturbasaun ruma. Tanba Komandu PNTL rasik koloka ona Batallaun Orden Públiku (BOP) iha Bazartete.

PNTL Liquiça mós kontinua implementa  regra Estadu Emerjénsia (EE) dalimak hodi sosializa informasaun ba povu atu kumpre nafatin regra saúde nian hodi lori sosiedade livre husi ameasa surtu COVID-19.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here