Plenária Parlamentu Nasionál. Imajen Tatoli/António Gonçalves

DILI, 10 setembru (TATOLI)—Reuniaun líder bankada, ohin, aprova ona ajenda eleisaun ba membru na’in-rua ba iha Conselho Imprensa (CI) ne’ebé sei realiza iha 16 setembru 2020.

Notísia Relevante: PN adia eleisaun ba membru Conselho de Imprensa

“Ohin, halo apresiasaun ba membru na’in-rua atu ba Conselho Imprensa ne’ebé mak pendente maibé ohin mós fixa ona data hodi halo eleisaun iha 16 setembru,” Sekretária Meza Parlamentu Nasionál, Deputada Lídia Martins, informa ba jornalista sira, iha Parlamentu Nasionál, kinta ne’e.

Entretantu Bankada parlamentár Congresso Nacional da Reconstrução de Timor (CNRT) propoin Expedito Loro Dias Ximenes, Bankada Frente Revolucionária de Timor-Leste Independente (FRETILIN) mantein Paulo Adriano da Cruz “Hunu Malu”, Bankada Partido Libertação Popular (PLP) propoin Jordão Antero Marques Henrique no Bankada UDT/FM propoin Deonaia da Silva Prego.

Lei Komunikasaun Sosiál artigu 45 kona-ba Kompozisaun Konsellu Imprensa alínea c, hateten sidadaun na’in-rua ne’ebé ho kapasidade be ema hotu hatene no iha méritu profisionál ho preferénsia ne’ebé hatutan ba komunikasaun sosiál, hosi sira na’in-rua ida nu’udar jurista, ne’ebé Parlamentu Nasionál hili.

Tuir lei Komuniasaun Sosiál nú 5 /2014, 19 novembru, Kapítulu VII estabelse Konsellu Imprensa (CI-sigla portugés), artigu 42 (Natureza no Independénsia), alínea 1, hateten  Konsellu Imprensa nu’udar entidade administrativu independente no hala’o ninia atribuisaun no mós kompeténsia la haktuir diretrís ka orientasaun sira podér polítiku nian.

Lei Komunikasaun kona-ba Kompozisaun Konsellu Imprensa hamutuk membru na’in-lima, ne’ebé atu hili liuhosi dalan tuir-mai:

a). Reprezentante jornalista na’in-rua ne’ebé sira hili tiha ona liuhosi eleisaun.

b). Reprezentante órgaun komunikasaun sosiál ida, ne’ebé órgaun sira hili tiha ona liuhosi eleisaun.

c). Sidadaun na’in-rua ne’ebé ho kapasidade be ema hotu hatene no iha méritu profisionál ho preferénsia ne’ebé hatutan ba komunikasaun sosiál, hosi sira na’in-rua ida nu’udar jurista, ne’ebé Parlamentu Nasionál hili.

d). Membru sira Konsellu Imprensa hili entre sira ninia Prezidente.

Entretantu, artigu 47 hosi Lei Komunikasaun Sosiál (Estatutu membru sira-nian) alínea 1 hateten bainhira membru Konsellu Imprensa hala’o knaar sei tau-hamutuk ho ezersísiu atividade profisionál ne’ebé hanesan, sei la selu nein fó subsídiu osan no la iha karatér permanente.

Alínea 2 hosi artigu ne’e fundamenta, membru sira Konsellu Imprensa iha direitu ba seña prezensa tuir termu ne’ebé ninia estatutu sei estabelese karik.

Tuir Rejimentu Parlamentu Nasionál (RPN) artigu 69 (Votatasaun nia forma) alíena 1. Votação nia forma sira hanessan tuir mai ne’e:

a. Votasaun ordinária;

b. Votasaun nominal;

b. Votasaun liuhosi ekcrutíniu sekretu.

d. La permite votasaun ho aklamasaun.

Ho eleisaun ba Membru Konsellu Imprensa uza RPN artigu 72 (Votasaun liuhosi eskrutíniu sekretu) katak, votasaun liuhosi eskrutíniu sekretu só bele uza iha eleisaun ka iha deliberaasaun ne’ebé, konforme Rejimentu ka Estatutu Deputadu sira-nian, tenke halo tuir forma ne’e, ka bainhira plenáriu delibera, tuir rekerimentu hosi Deputadu na’in-10.

Purtantu RPN Artigu 73 (Empate iha votasaun) alínea1 hateten, karik votasaun fó rezultado empate, matéria ne’ebé sai nu’udar objetu ba votasaun sei diskute tan molok tau hikas ba votasaun foun.

Alínea 2 hosi artigu 73 ne’e esplika, empate iha votasaun daruak sei konsidera katak la aprova.

 Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here