Diretór Jerál AA/Alfándega, José António Fátima Abílio. Imajen Tatoli/Jogerjo Guterres

DILI, 10 setembru 2020 (TATOLI)-Hahú fulan janeiru to’o jullu 2020, Autoridade Aduaneira (AA)/Alfándega hatama reseita ba kofre Estadu liuhosi atividade importasaun hamutuk $34.394.015,51.

Diretór Jerál Alfándega, José António Fátima Abílio, hateten reseita ne’e Alfándega kobre hosi atividade ekonómiku sira durante fulan hitu.

Tuir dadus hosi AA relata katak, reseita iha fulan-janeiru ho valór $5.648.171,40, fevereiru $5.751.716,88, marsu tanba tama iha situasaun COVID-19 hahú tun ba $4.874.232,11, abríl tun signifikante ba $2.568.442,17.

Iha fulan-maiu reseita hahú rekupera ho valór $3.832.936,19, juñu $4.102.527,71 no iha jullu sa’e ba $7.579.989,05, tanba ne’e totál reseita ne’ebé Alfándega konsege kobre durante janeiru to’o jullu 2020 hamutuk $34.394.015,51.

Direjente Alfándega ne’e informa, sasán sira ne’ebé baibain importa mak hanesan na’an-fahi, karau, manu, manu-tolu, no ikan , bee-minerál no foos.

“Reseita ne’e tun no sa’e depende volume importasaun sasán sira, kuandu importasaun menus automátikamente afeta ba reseita tanba Alfándega halo kolleta reseita haree ba volume importasaun. Tanba ne’e, kuandu importasaun maka’as entaun sa’e no menus maka reseita mós sei menus,” relata Diretór Jeral Alfándega ba Agência Tatoli, foin lalais ne’e, iha ninia knaar fatin, Palasiu Governu.

Sasán ne’ebé maka importa iha fulan hitu nia-laran kompostu hosi na’an-fahi ho kuantidade kilograma 288.017,96, na’an-karau kilograma 7.605,28, na’an-manu kilograma 5.752.826,16, manu-tolun kilograma 564.077,64, ikan kilograma 924.390,37, bee-minerál 20.733.359,99 no foos 79.926.924,17.

Nune’e mós, durante fulan-hitu nia-laran konsege importa motorizada hamutuk 5.646 no veíkulu hamutuk 662.

Enkuantu, totál kontentór ne’ebé tama iha janeiru hamutuk 2.567 ho ninia númeru  single administrative document (SAD’s) 1491, iha fevereiru kontentór 2.734 ho númeru SAD’s 1455, marsu kontentór 2,317 ho númeru SAD’s 1183 no abríl kontentór 1,446 ho númeru SAD’s 772.

Tuir responsável ne’e, volume importasaun kompara ho antes seidauk pandemia COVID-19 volume importasaun aumenta, maibé iha ámbitu pandemia tanba kuaze nasaun hotu lockdown maka afeta redusaun atividade ekonómika tanba foku liu kombate moras COVID-19.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here