Ministru Obra Públika, Salvador Eugênio Soares dos Reis Pires. Imajen Tatoli/Egas Cristovão

DILI, 10 setembru 2020 (TATOLI)-Primeiru-Ministru (PM), Taur Matan Ruak, konvoka reuniaun ho Primeiru-Ministru no Ministru Planu no Ordenamentu, José Maria dos Reis no Ministru Obra Públika, Salvador Eugênio Soares dos Reis Pires, hodi diskute projetu iha tinan fiskál 2021.

“Ami ko’alia kona-ba projetu sira ein kursu no mós projetu foun atu halo iha tinan 2021 iha área infraestrutura nian. Ami aprezenta oituan kona-ba saida mak halo ona no projetu foun liga ho kompeténsia obra públika hanesan bee-moos, eletrisidade no estrada,” relata Ministru Salvador iha Palásiu Governu, kinta ne’e.

Aleinde ne’e, objetivu hosi diskusaun ne’e atu estabelese montante orsamentu ba iha área infraestrutura molok halo diskusaun iha Komité Revizaun Orsamentu Polítika (KROP) ba Proposta Lei Orsamentu Jerál Estadu (OJE) 2021 ne’ebé sei realiza iha tempu badak.

Maski nune’e, Governu foin ko’alia vizaun jerál ba projetu tinan oin no seidauk ko’alia projetu nia detallu.

“Ami foin ko’alia kuantidade no projetu ninia estatutu, progresu ein kursu no mós iha posibilidade investimentu. Ami seidauk fiksa montante investimentu maibé haree posibilidade espasu fiskál hosi projetu ne’ebé Governu kompromete iha kontratu bele la’o no espasu fiskál halo investimentu ba projetu ne’ebé Governu hanoin atu halo,” nia akresenta.

Governante ne’e rekoñese katak durante mandatu VIII Governu iha problema barak tanba impase polítika maka halo investimentu no meta sira ne’ebé atu atinje seidauk la’o loloos.

Tanba ne’e, Ministru konsidera 2021 nu’udar tinan oin oportunu ba Governu atu atinje meta kuinkenál (tinan-lima) ne’ebé Xefe Governu aprezenta ba Parlamentu Nasionál no sai hanesan programa prinsipál  Governu.

Projetu fundu infraestrutura 300 la’o hela

Projetu sira ein kursu maka bee-moos, eletrisidade, no estrada, tanba ne’e Governu sei haree mós espasu fiskál atu akomoda inisiativa foun sira tuir meta ne’ebé VIII Governu Konstitusionál hakarak atinje.

“Projetu lubuk ida mak ein kursu, hanesan iha fundu infraestrutura rasik iha projetu 300-resin ne’ebé mak la’o hela no iha liña ministériu iha 200 resin,” Ministru Salvador informa.

Nia esplika, projetu ne’ebé la’o hela iha área eletrisidade, bee-moos no estrada.

Enkuantu, iha tinan 2021 Governu iha inisiativa foun hanesan projetu estrada munisipál no projetu eletrisidade hamutuk pakote 31.“Governu haree hela projetu foun ninia montante orsamentu bele akomoda ho projetu ein kursu sira ne’e hira, maka ita kompromete disponibiliza rekursu atubele hahú projetu sira ne’e,” nia akresenta.

Reuniaun ne’e,  Xefe Governu orienta Ministru Obra Públika atu reforsa kontrolu fiskalizasaun projetu sira ne’ebé la’o iha terrenu atubele garante ninia kualidade hodi dura ba tempu naruk.

Enkontru ne’e, partisipa mós hosi Diretór Ajénsia Dezenvolvimentu Nasionál (ADN), Renato Mariano Monteiro no ekipa tékniku hosi Ministériu Planu no Ordenamentu no Ministru Obra Públika.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here