Diretór Ezekutivu Sentru Estudu ba Pás no Dezenvolvimentu, João Boavida. Imajen/Tatoli Egas Cristovao

DILI, 09 setembru 2020 (TATOLI)—Diretór Ezekutivu Sentru Estudu ba Pás no Dezenvolvimentu (CEPAD-sigla portugés), João Boavida, husu ba Comissão Antí Corrupção (CAC) presiza hasa’e liután volume sensibilizasaun ba lei Medida Prevensaun no Kombate Korrupsaun (MPCC-sigla portugés) ba komunidade sira.

Notísia Relevante: CEPAD husu deputadu sira tenke kumpre lei MPCC

João Boavida hateten, sosializasaun ba lei MPCC ne’e  importante tebes tanba ne’e instituisaun sira hanesan Governu, Parlamentu no autór judisiáriu sira tenke halo sosializasaun hafoin hakat ba iha komunidade tomak hanesan setór privadu, sosiedade sivil, igreja mós tenke hetan hotu sensibilizasaun ne’e la’o hanesan. 

Nia dehan, CEPAD kontente ba Timor-Leste iha ona lei MPCC tanba lei ne’e ema hotu  hein kleur ona dezde 2009,  finalemente aprovadu ona no  promulgadu iha 26 agostu 2020 hosi Prezidente Repúblika.

Diretór CEPAD ne’e fundamenta ho esperiénsia kontekstu Timor-Leste nian katak lei de’it la natoon, iha lei barak ona, maibé ninia impelmentasaun la efetivu. Tanba, tuir nia, populasaun mak seidauk hatene di’ak lei ne’e ka prosesu formulasaun lei ne’e, involvimentu populasaun ba prosesu ladún kle’an, bainhira promulgadu servisu boot mak tenke sensibiliza lei ne’e ba komunidade sira.

“Liuhosi prevensaun edukasaun ha’u fiar katak Comissão Antí Corrupção (CAC) sei tau atensaun ba ida-ne’e. Seluk mós kona-ba kombate korrupsaun tenke sosializa aspetu ida-ne’e ba públiku tomak. Ida-ne’e la la’o, ha’u hanoin Lei MPCC ne’ebé  promulgadu ona sei sai lei de’it,” nia dehan ba jornalista sira, iha nia kna’ar-fatin, Bidau, Dili, kuarta ne’e.

Nia hatutan, lei  ida-ne’e no sira seluk hanesan nia implementasaun sei presiza atensaun la’ós Comissão Antí Corrupção (CAC) de’it maibé sosiedade sivíl, liuliu hosi mídia, tanba mídia mak la’o tuir lei ida-ne’e iha ninia implementasaun, prosesu prevensaun no sosializasaun nian.

“Tanba Parlamentu Nasionál la’ós de’it atu aprova lei de’it, maibé sira tenke la’o tuir hodi tau-matan nafatin ninia implementasaun ne’e to’o ona iha ne’ebé ona. Se halo hanesan ne’e, ita hatene katak lei ne’e sei halo diferénsia maibé se la la’o tuir mak ida-ne’e sei sai hanesan lei ida tán de’it hanesan lei sira seluk,” nia hateten. 

Aleinde ne’e, Diretór CEPAD ne’e fó ezemplu, lei protesaun ba sasin nian presiza verifika didi’ak nune’e ema ne’ebé fó sasin ba kazu korrupsaun ruma tenke garantidu.

“Imi bolu ema-ida ba  sasin iha kazu korrupsaun, ema tauk atu ba, tanba karik iha prosesu dezeñu no formula lei ne’e,  komunidade sira la involve entaun sira lahatene lei ne’e nia protesaun ba komunidade sira nu’udar sasin la’o oinsá. Ema tauk. Lideransa CAC atu sai pro-ativu ba ninia kreatividade oinsá mak implementa lei ida-ne’e, halo kolaborasaun ho mídia, sosiedade sivil no setór emprezariu sira, tanba ema hotu la livre ba buat sira ne’e hotu,” nia dehan. 

Notísia Relevante: CEPAD husu Governu tradús lei MPCC ba dalen tetun

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here