Alunu Ofisiál Superiór Polísia Nasionál Timor-Leste (PNTL) no FALINTIL-Forsa Defeza Timor-Leste (F-FDTL) na’in-29 ne’ebé tuir kursu V (5o) Promosaun Ofisiál Superiór (CPOS) iha Institutu Defeza Nasionál Timor-Leste (IDN-TL) aprende matéria liuhusi vídeo konferénsia. Imajen/IDN-TL

DILI, 10 setembru 2020 (TATOLI)- Alunu Ofisiál Superiór Polísia Nasionál Timor-Leste (PNTL) no FALINTIL-Forsa Defeza Timor-Leste (F-FDTL) na’in-29 ne’ebé tuir kursu V (5o) Promosaun Ofisiál Superiór (CPOS) iha Institutu Defeza Nasionál Timor-Leste (IDN-TL) aprende matéria liuhusi vídeo konferénsia.

Alunu CPOS 29 ne’e  kompostu husi ofisiál polísia ho diviza inspetór na’in-sia (9) no ofisiál F-FDTL ho diviza kapitaun na’in-20 aprende matéria liuhusi plataforma  online vídeo konferénsia  ne’ebé hanorin direita husi Profesór Doutór Ilonka Metzen durante oras rua (2) hahú husi tuku 16: 00 Otl to’o  tuku 18:00 Otl, iha auditoria IDN, Palaçio do Governo, Dili.

Diretór Akademia IDN-TL, Guilherme Soares informa, alunu sira hahú aprende matéria liuhusi vídeo konferénsia, tanba Profesór Doutór Ilonka Metzen ne’ebé hela iha estranjeiru labele vizita mai Timor-Leste, tanba nasaun barak sei taka fronteira hodi evita propagasaun surtu COVID-19.

Guilherme dehan,  modalidade ne’ebé IDN utiliza koordena ho dosente sira atu hala’o prosesu aprendizajen liuhusi plataforma online vídeo konferénsia ho alunu sira  hodi kompleta matéria no fasilita alunu 5o  KPOS nia estudu .

“Ho situasaun atuál mundu enfrenta propagasaun COVID-19, ho maneira hetan lisaun liuhusi plataforma online vídeo konferénsia, pelumenus bele fasilita prosesu estudu alunu VCPOS, maibé iha nia difikuldade ida bainhira internet la’o para, sei afeta ba prosesu aprendizajen ba alunu sira, maibé ne’e la sai obstákulu ba vontade alunu sira nian hodi aprende,”  dehan Diretór Akademia IDN-TL, Guilherme Soares, liuhusi komunikadu imprensa ne’ebé Agência Tatoli asesu, ohin.

IDN konsidera katak, matéria ne’ebé alunu sira aprende kona-ba importánsia Estudu Africanus ba alunu 5o KPOS, tanba, Timor-Leste nu’udar nasaun ida enkuadra iha nasaun CPLP maioria husi kontinente Afrika, no Timor -Leste mós membru g7+. Membru barak husi Afrika, nune’e  ofisiál, Misaun Nasaun Unidas  bele hanorin PNTL ho F-FDTL atu bele partisipa hala’o misaun iha kontinente Afrika hodi bele komprende  istória husi nasaun iha Afrika nian.

Nia hatutan, ba Timoroan sira ne’ebé hala’o misaun hanesan diplomata sira mós presiza aulas ida hodi hametin liután relasaun Timor-Leste ho nasaun sira seluk ne’ebé integra iha kooperasaun PALOP (País Africanos da Língua Portuguesa) e País  Francofonia.

Iha fatin hanesan, hanesan alunu V CPOS Primeiru Tenente, António de Rosario husi Komponente Navál F-FDTL konsidera, matéria ne’ebé aprende kona-ba Estudu Afrikanu liuhusi plataforma online vídeo konferénsia ne’e bele ajuda sira kompriende lisaun estudu Afrikanu husi Dosente Ilonka  hodi kompleta sira nia estudu.

Nia hatutan, mezmu sira aprende matéria via vídeo konferénsia, maibé bele loke ona sira nia hanoin oinsá maka dezenvolve sira nia kapasidade durante kursu.

Iha parte seluk, Inspetór Xefe, Manuel Maria dos Santos,  dehan nia sente orgullu, tanba bele aprende lisaun ho di’ak, mezmu liuhusi vídeo konferénsia.

 Jornalista   : Eugénio Pereira

Editór         : Francisco Simões

HAKEREK NO HATÁN

Please enter your comment!
Please enter your name here