Prezidente Rede Feto Timor-Leste, Judite Dias Ximenes. Imajen /Nelson de Sousa

DILI 09 setembru 2020–Prezidente Rede Feto, Judite Dias Ximenes, hateten projetu peskiza Kualitativu Análize Jéneru Ba Feto Nia Empoderamentu Ekonomia Durante COVID-19 ne’ebé lidera hosi Rede Feto no implementa hosi membru organizasaun Rede Feto 13 no parseiru Arquiris hosi fulan jullu-dezembru 2020 ne’e, ho apoiu fundu hosi UN Women ho montante $106.780.00.

“Rede Feto hala’o peskiza Kualitativu Análize Jéneru Ba Feto Nia Empoderamentu Ekonomia Durante COVID-19 ne’e, fundu mai hosi UN Women hamutuk $106.780.00. Peskiza ida-ne’e atu buka komprende dimensaun jéneru no impaktu xave ba feto nia sósiu-ekonómiku iha setór informál no influénsia desizaun ba intervensaun polítika hodi responde ba feto nia nesesidade sósiu-ekonómiku iha situasaun emerjénsia iha futuru,” dehan Judite Dias Ximenes, liuhosi konferensia imprensa iha edifísiu Obrigadu Barak, Dili, kuarta ne’e. 

Nia informa, peskiza ne’e halibur dadus hosi respondente feto na’in 1400 ho idade tinan 17 ba leten iha munisípiu 12 no RAEOA, hosi alvu prinsipál sira mak hanesan vendedora ho eskala kiik‚ feto ho defisiénsia‚ servisu doméstika‚ inan abandonada no feto faluk‚ feto ho orientasaun sexuál diferente‚ feto ne’ebé esperiénsia violénsia doméstika no krime pasadu.

Ho limitasaun movimentu durante Estadu Emerjensia (EE) iha fulan Marsu to’o Maiu, Preizdente Rede Feto ne’e hateten, barak mak pániku tanba la serteja kona-ba bainhira loos mak COVID ne’e ramata.

Nia informa, rezultadu peskiza hatudu katak feto vulneravel sira sai preokupa liután tanba osan laiha‚ liuliu ba sira ne’ebé servisu nu’udar cleaner (hamoos-rai)‚ servisu iha loja‚ restorante‚ faan hahan iha dalan ninin‚  traballador doméstika‚ pinera rai-henek‚ soru tais‚ faan obralan no suku roupa sira-ne’e.

Nia hateten, respondente feto faluk ida ne’ebé mós nu’udar vendedora iha Munisípiu Baucau deklara katak nia sente EE todan hanesan funu boot ida no feto foinsa’e ho defisiénsia ida iha Munisípiu Ermera ne’ebé mós nu’udar feto faluk no vendedora ida deklara katak situasaun ne’e halo nia sente triste‚ tauk no akompaña ho hirus.

Maibé, nia hateten, Governu halo ona parte pozitivu ida hodi oferese subsídiu uma-kain hodi responde ba nesesidade báziku iha situasaun emerjénsia no maioria respondente deklara katak subsídiu ne’e tulun rekupera sira-nia nesesidade báziku família nian. 

Maske nune’e, nia haktuir,  feto vulneravel barak hato’o lamentasaun katak sira la hetan subsídiu tanba la asesu ba informasaun no informasaun to’o iha sira-nia tilun tarde liu. Situasaun ne’e maioria hasoru hosi feto ho defisiénsia‚ inan solteira‚ abandonada, feto faluk, vendedora no vítima violénsia doméstika ne’ebé hela iha uma mahon. 

Judite Dias afirma katak feto ida ho identidade orientasaun sexuál diferente hosi komunidade LBT espresa katak nia sente moe no tauk atu ba halo fixa família tanba tuir ninia hanoin katak sei la hetan atendementu dignu relasiona ho ninia identidade seksual.    

“Haree ba impaktu COVID-19 ba tempu naruk no Rede Feto nia knaar advokásia atu integra iha politika Governu, promosaun igualdade jéneru no hakbiit feto nia ekonómika rurál. Peskiza ida-ne’e identifika tipu feto vulneravel iha família ne’ebé presiza tau atensaun hodi responde ba sira-nia nesesidade di’ak liután,” nia dehan. 

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here