Diretor Jerál Sekretariadu Téknika Administrasaun Eleitorál (STAE), Acilino Manuel Branco. Imajen TATOLI/Osória Marques.

DILI, 09 setembru 2020 (TATOLI)–Diretor Jerál Sekretariadu Téknika Administrasaun Eleitorál (STAE), Acilino Manuel Branco, hateten STAE komunika partidu polítiku sira atu sai pontu ligasaun ba STAE iha kualker prosesu.

Alcinio manuel Branco hatutan, iha siklu importante STAE hakarak prezensa partidu polítiku sira másimu iha prosesu sira ne’e hotu.

“Ita hanoin katak iha siklu importante ita hakarak prezensa partidu polítiku sira másimu iha prosesu sira ne’e hotu. Tanba ne’e mak ita komunika ho partidu polítiku sira no haruka sira-nia pontu vogál na’in-rua (2) hosi kada partidu para atu bele sai hanesan pontu ligasaun hodi kontaktu ho STAE hodi komunika no informa kualker prosesu hotu,” dehan Diretor Jerál STAE, Acilino Manuel Branco, ba jornalista sira iha salaun STAE, Vera-cruz, Dili, kuarta ne’e.

Nia esplika, resensiamentu eleitorál tuir lei 6/2016 hatete katak partidu polítiku iha direitu atu halo fiskalizasaun ba prosesu ida-ne’e, iha prosesu kotuk ne’e hetan fiskalizasaun hosi partidu sira maibé ladún iha partisipasaun ne’ebé mak másimu.

Tanba ne’e, nia husu ba partidu polítiku sira atu nomeia sira-nia reperezenta fiskais hodi halo fiskalizasaun ba baze dadus.

“Ita husu ba partidu sira hotu atu bele nomea fiskais partidu polítiku sira tau halo fiskalizasaun no mós resensamentu atualizasaun baze dadus. Maibé tuir loloos mós ita realiza iha rai-liur tanba sitausaun COVID-19 ho orsamentu entaun provizoriamente ita realiza iha nasionál iha nivel munisípiu 12 akeinde RAEOA,” nia dehan. 

Tuir nia, bainhira tinan oin mak Timor-Leste ultrapasa ona mak sei halo fiskalizasaun resensiamentu iha rai-liur entaun partidu politiku sira tenke halo prosesu resensiamentu ne’e rasik.

“Entaun, ita hanoin katak atualizasaun resensiamentu baze dadus ne’e aktu eleitorál ida-ne’ebé importante. Lori determina prosesu eleitorál sira tanba resensiamentu eleitorál ne’e rejistu sidadaun sira ne’ebé iha direitu atu ezerse sira-nia direitu votu. Entaun, partidu polítiku sira tenke halo prosesu resensiamentu ne’e rasik nune’e bele hatene loloos eleitór hira mak aban bainrua sei hetan,” nia hateten. 

Nia akresenta, maneira sira-ne’ebé mak bele promove sira iha prosesu ne’e rasik no hodi bele garante kredibilidade prosesu eleitorál hirak ne’ebé mak aban bainrua sei akontese iha futuru.

Diretór STAE ne’e hateten, infelizmente STAE haruka hotu karta ba partidu polítiku sira ne’ebé mak rejistu ona iha Ministériu Justisa maibé partidu balun ohin la partisipa tanba balun sei iha prosesu administrativu hela ne’ebé liga ho prosesu akreditasaun no sei halo ajustamentu.

‘Ita haree ba prezensa ne’ebé mak iha mak partidu sira ne’ebé konkore iha tinan kotuk ne’e, partisipa hotu kedas Só iha partidu balun ne’ebé mak ita haruka karta ba mak sira la resposta mak partidu Trabalhista no KOTA mak la rejistu ona,” nia hatete.

Nia informa, iha 2020-2024 ne’e iha siklu eleitorál importante liuliu aktu eleitorál ne’ebé mak sei implementa iha Timor hahú hosi resensiamentu eleitorál no preprativu hasoru eleisaun 2022. Eleisaun lejislativa iha 2023 no tuir mai eleisaun suku no posivelmente iha tinan ne’e nia-laran iha eleisaun munisipál nian.

“Ita hanoin katak partidu polítiku sira kona-ba informasaun lala’ok preparativu ba aktu sira-ne’e hotu liuliu aktu importante ida-ne’ebé oras ne’e daudaun la’o hela iha territóriu nasionál,” nia hateten. 

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here