Sekretária Estadu Igualidade no Inklusaun, Maria José da Fonseca Monteiro de Jesus, entrega programa SEII ba Ministru Asuntu Parlamentár no Komunikasaun Sosiál, Francisco Jerónimo, iha gabinete MAPKOMS, Palásiu Governu, kuarta (09/09). Imajen/Mídia MAPKOMS

DILI, 09 setembru 2020 (TATOLI)-Sekretária Estadu Igualdade no Inklusaun (SEII), Maria José da Fonseca Monteiro de Jesus, halo audénsia ho Ministru Asuntu Parlamentár no Komunikasaun Sosiál (MAPKOMS), Francisco Jerónimo, hodi ko’alia kona-ba kooperasaun ba sensibilizasaun igualdade jérenu to’o aréa rurál.

“Ami buka meiu atu Ministru Asuntu Parlamentár no Komunikasaun Sosiál bele apoia ami liuhosi programa ida, atu nune’e asuntu igualdade jéneru labele iha de’it nasionál maibé bele to’o iha área rurál. Ita iha rádiu komunidade ne’ebé liuhosi kanál bele hato’o,” tenik Sekretária Estadu Maria José hafoin reuniaun ho Ministru Francisco, iha gabinete MAPKOMS, Palásiu Governu, kuarta ne’e.

Iha fatin hanesan, Ministru Francisco, hateten MAPKOMS prontu fó apoiu SEII ba divulgasaun programa liuhosi mídia.

“Uza mídia halo promosaun, liuliu kona-ba asuntu igualdade jéneru atu halo balansu, hahú hosi nível leten to’o baze,” nia akresenta.

Governante ne’e dehan, iha kooperasaun ne’e MAPKOMS husu SEII hamutuk halo sensibilizasaun ba kestaun balansu jéneru to’o baze ho komunidade sira, tanba daudaun ne’e Governu iha programa Naroman ba Suku ne’ebé bele fasilita di’ak liután.

“Sira bele ko’alia direitamente ho povu sira iha baze atu promove no muda hanoin, nune’e iha fali balansu jéneru no sensível ba jeneru ne’ebé bele sente katak asuntu ne’e importante atu ita hotu komunga saida maka ita-nia hakarak iha rai ne’e,” nia subliña.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here