Sekretária Estadu Igualdade no Inklusaun, Maria José da Fonseca Monteiro de Jesus. Imajen Tatoli/António Gonçalves

DILI, 09 setembru 2020 (TATOLI)-Sekretária Estadu Igualdade no Inklusaun (SEII), Maria José da Fonseca Monteiro de Jesus, entrega dokumentu importante haat kona-ba jéneru ba Ministru Asuntu Parlamentár no Komunikasaun Sosiál (MAPKOMS), Francisco Jerónimo, hodi bele divulga liuhosi mídia.

“Ami fahe dokumentu balun ne’ebé bele sai referénsia ba Señor Ministru no uza halo serbisu. Dala barak ema dehan SEII halo serbisu ba igualdade jéneru de’it maibé ami haree mós ba asuntu inklusaun sosiál,” dehan Sekretária Estadu Maria José, iha Palásiu Governu, kuarta ne’e.

Dokumentu haat ne’ebé entrega ba MAPKOMS maka hanesan konvesaun ba violénsia doméstika, konvensaun komité ba eliminasaun forma Violénsia hotu hasoru feto (CEDAW, sigla inglés), rezolusaun Governu kona-ba planu asaun kontra violénsia doméstika bazeia ba jéneru, no rezolusaun Parlamentu Nasionál kona-ba sensível ba jéneru.

Iha fatin hanesan, Ministru Francisco, hateten dokumentu ne’e sei divulga ba mídia hotu hodi ema hotu bele asesu informasaun.

“Ami ko’alia atu fó sai informasaun sensível jéneru liuhosi mídia, nune’e ita bele ko’alia kona-ba igualdade jéneru no haree balansu jéneru iha nível hotu,” Ministru haktuir.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here