Loggo OMS.

DILI, 9 setembru 2020 (TATOLI) – Organizasaun Mundiál ba Saúde (OMS) iha rejiaun Sudeste Aziátika organiza diskusaun ba dala 73 kona-ba medida limita surtu Covid-19; oinsá mantein servisu saúde esensiál hosi ‘tranzisaun’ ba ‘normál foun’.

Nasaun Tailándia mak organiza sesaun ba tinan ne’e ho virtuál. Surumutu ne’e akontese durante loron rua, hahú loron 9 no 10 fulan-setembru tinan ne’e.

Partisipante hasoru-malu virtuál ba loron rua mak Diretór Jerál OMS, Tedros Adhanom, Diretora Rejionál ba OMS Sudeste Aziátiku, Poonam Khetrapal Singh, Ministru Saúde no ofisiál seniór saúde sira hosi membru nasaun iha rejiaun ne’e, ajénsia Organizasaun Nasoins Unidas, parseiru, doadór sira, no reprezentante sosiedade sivíl.

Nota komunikadu ne’ebé TATOLI simu hosi mídia OMS iha Dili hatete pandemia ne’e afeta tebes sistema saúde iha rejiaun ne’e tomak. Hatutan tan, hanesan parte ida hatan ba Covid-19, OMS sempre mantein servisu saúde esensiál no aselera kontinuasaun servisu saúde ne’ebé hetan interupsaun.

Ajenda balun hosi enkontru loron-rua ne’e maka sei diskuti progresu avaliasaun médiu-termu, dezafiu, kapasitasaun no oportunidade ba dékada fortalesimentu forsa traballadór saúde nian ba tinan 2015-2024; no relatóriu anuál ba progresu ba monitorizasaun kobertura saúde universál no asuntu saúde nian ne’ebé relasiona ho Objetivu Dezenvolvimentu Sustentavel.

Sesaun Komite Rejionál 73 ne’e sei ko’alia mós progresu implementasaun balun hosi rezolusaun ikus ne’ebé adopta hosi Komite Rejionál, hanesan promove atividade fízika, planu asaun rejionál hodi hamenus hemu tua ka alkol, asesu ba ai-moruk, kontrola dengue, no elimina malaria, no elimina sarampu no rubela.

Rejiaun Sudeste Aziátika hanesan uma ba populasaun kahaat-ida (um-kuartu) iha mundu, Rejiaun ne’e iha programa prioridade emblemátika ualu – elimina sarampu no rubella iha tinan 2023; prevene no kontrola moras la hada’et sira liuhosi planu no polítika multisetorál, ho foka ba “opsaun di’ak” (sigla Inglés: best buy); aselera servisu hosi hamenus taxa mortalidade iha maternál, neonatal no labarik idade menus hosi tinan lima; kontinua halo progresu ba kobertura saúde universál ho foka ba rekursu umanu iha saúde no servisu esensiál ba ai-moruk.

Seluk mak haforsa liután kapasidade nasionál hodi prevene no kombate rezisténsia ba antimikrobiál; hasa’et dezenvolvimentu kapasidade iha jestaun risku emerjénsia nian iha nasaun sira; remata ho tarefa atu elimina moras trópiku abandonadu no moras sira seluk ne’ebé iha ona pasu eliminasaun; aselera esforsu hodi hapara TB iha tinan 2030.

Rejiaun ida ne’e halo ona progresu ne’ebé di’ak tebes iha nia programa emblemátiku sira ne’e no barak liután. Durante Sesaun ne’e, iha nasaun balun mak sei simu felisitasaun ba susesu foin lalais ne’e iha área saúde públiku. (ki)

HAKEREK NO HATÁN

Please enter your comment!
Please enter your name here