DILI, 09 setembru 2020 (TATOLI)-Defensoria Publika (PD) kontinua fó asisténsia jurídika ba sidadaun durante férias judisiál, hahú husi loron 01 agostu to’o 15 setembru 2020.
Notísia Relevante : DP sei halo promosaun no progresaun ba defensór ho ofisial justisa
Defensor Públiku Jerál, Câncio Xavier hatete, normálmente tuir lei ferias judisiál ne’e kada tinan sempre akontese ba autór judisiál sira inklui defensór atu hetan feriadu.
Nia esplika, durante férias judisiál, julgamentu sira la’o iha tribunál atende de’it kazu ba prosesu ho karater urjénsia, tanba ne’e nia parte aplika turnu kada loron ba defensór no ofisial justisa hodi akompaña julgamentu urjénsia sira ne’ebé la’o.
“Ami aplika turnu ba defensór sira hodi kontinua fó asisténsia ba sidadaun ba prosesu krime hanesan primeiru interrogatóriu, sumáriu, arguidu detidu ho prezu, no ba prosesu sivíl hanesan restituisaun pose no providénsia kautela,” hateten Defensor Públiku Jerál, Câncio Xavier, ohin, ba Agência Tatoli iha nia kna’ar fatin, Dili.
Nia hateten, servisu defensoria mós halo akompañamentu ba kazu sira ho nia pena abstrata tinan-tolu ba leten ne’ebé marka ona iha loron ferias judisiál ba julgamentu kontinua hodi nune’e prova ne’ebé iha labele lakon.
Defensoria Publika nu’udar instituisaun publika esensiál Estadu nian ho nia knar eskluziva fó asisténsia jurídika, judisiária no extrajudisial ba sidadaun sira ne’ebé buka no hasoru justisa.
Estadu liuhusi Assembleia Konstituinte ne’ebé hakerek Konstituisaun RDTL hatuur artigu 1350 nu’udar prinsípiu fundamental Timor-Leste boa administrasaun justisa ne’ebé metin, efikás, efisiénsia, gratuita no asesivel, atu garante no promove sidadaun sira nia direitu fundamental respeitu ba lei no demokrasia nia prinsípiu sira.
Tuir dadus husi Defensoria Publika durante férias judisiál, servisu Defensoria Públika Munisípiu Dili atende prosesu kazu krime urjente hamutuk 21; kompostu husi primeiru interrogatóriu 12, sumáriu sia no prosesu sivíl ida (1) kona-ba prosesu embargu.
Husi númeru kazu krime ne’e ho nia tipu hanesan krime arma branka tolu (3), infantisídiu ida (1), krime uza osan falsu ida (1), omisídiu atentadu ida (1), abuzu seksuál menór tolu (3), danu agravadu rua (2), ofensa simples tolu (3), kondusaun sen karta tolu (3) no krime jogu ilísitu tolu (3).
Defensoria Munisípiu Baucau atende prosesu urjente primeiru interrogatóriu rua (2), ho tipu kazu tentativa omisídiu ida (1) no violasaun seksuál ida (1) ba prosesu sivíl iha ida (1) kona-ba providénsia kautela embargu obra.
Ba servisu Defensoria Munisípiu Suai iha de’it simu notifikasaun 66 prosesu husi tribunál, kazu foun 12, julgamentu kontinuasaun 14, arkiva rua (2) no desizaun eskrita rua (2), enkuantu ba prosesu urjente laiha.
Defensoria Publika Rejiaun Administrativu Espesiál Oe-Cusse Ambeno (RAEOA) mós atende prosesu urjente krime primeiru interrogatóriu rua (2) no prosesu sivíl rua (2) kona-ba providénsia kautela.
Jornalista : Nelson de Sousa
Editór : Francisco Simões
