Xefe Departamentu Saneamentu Munisípiu Dili, Domingos Soriano. Imajen Tatoli/Osória Marques.

DILI, 08 setembru 2020 (TATOLI)–Xefe Departementu Saneamentu Munisípiu Dili, Domingos Soriano, preokupa ho saláriu traballadór raut foer sira iha dalan púbiku tanba kompaña fó kontratu ba traballadór kada fulan ida $100 ne’e la tuir saláriu estandarizasaun Sekretariadu Estadu Formasaun Professional Empregu (SEFOPE).

Notísia Relevante: Pesoál saneamentu sei la halo servisu bainhira la simu subsídiu liña frente

“Ami-nia preokupasaun ba traballadór raut foer ne’e ita hanoin fali tanba sira-nia saláriu mínimu liu. Tanba, kompaña fó kontratu ba traballadór sira ne’e kada fulan ida $100 de’it, ne’e la saláriu estandarizasaun hosi SEFOPE,” dehan Xefe Departementu Saneamentu Munisípiu Dili, Domingos Soriano, ba Agência TATOLI iha nia knaar fatin Matadoru, Dili, segunda (07/09/2020).

Tanba, nia dehan, servisu raut foer iha dalan públiku ne’e todan tebes no hala’o loro-loron maibé osan kiik no la sufisiente ba sira-nia nesesidade loro-loron nian, tanba ne’e mak presiza haree ba kestaun hirak ne’e.

“Ha’u ko’alia hanesan xefe departamentu saneamentu ne’e, maibé ida-ne’e kompeténsia kompaña ne’ebé mak fó kontratu no durante ne’e tau-matan ba traballadór sira. Hosi Estatál Dili liuhosi  munisípiu fó kontratu ba kompaña de’it,” nia dehan. 

Jornalista: Osória Marques

Editór: Cancio Ximenes

 

HAKEREK NO HATÁN

Please enter your comment!
Please enter your name here