Primeiru-Ministru, Taur Matan Ruak, diskute aeroportu Baucau no seguransa marítima ho ministériu relevante, iha palásiu Governu, tersa (08/09). Imajen Tatoli/António Gonçalves

DILI, 08 setembru 2020 (TATOLI)-Primeiru-Ministru (PM), Taur Matan Ruak, konvoka reuniaun ho Ministru Prezidénsia Konsellu Ministru Fidelis Manuel Leite Magalhães, Ministru Defeza Filomeno Paixão no Ministru Negósiu Estranjeiru no Kooperasaun Adaljiza Albertina Xavier Reis Magno, hodi ko’alia kona-ba nota entendimentu ho Estadu Unidu Amerika (EUA) no Austrália.

Ministru Filomeno, esplika entendimentu ne’ebé atu halo ho nasaun rua ne’e maka akordu ho Governu EUA ba reabilitasaun aeroportu Baucau no prepara akordu ho Governu Austrália ba vijilánsia iha tasi Kosta Súl.

“Ko’alia kona-ba memorandu ne’ebé maka ita atu halo ho Estadu Unidu Amérika atu dezenvolve aeroportu  Baucau, enkuantu hamutuk ho Austrália atu kontrolu iha parte marítima iha tasi Kosta Súl, no ko’alia mós kona-ba aspeitu forsa defeza Timor-Leste,” tenik governante ne’e iha Palásiu Governu, tersa ne’e.

Notísia Relevante: EUA Husu Aselera Reabilitasaun Aeroporto de Baucau

Tuir Ministru, akordu ho EUA no Austrália daudaun ne’e iha hela prosesu no halo hela koordensasaun ho MNEK.

Reabiliasaun aeroportu Baucau ne’e Governu nasaun rua iha ona entendimentu maibé falta akordu atu fó hatene intensaun.

“Sira-nia parte hateten katak Governu Timor-Leste maka hatene atu halo saida tanba Aeroportu Baucau pertense Timór nian no sira hakarak ajuda de’it forsa sira atu reabilita, hodi tau armajen boot ajuda fó apoiu umanitáriu ba populasaun no halo vijilánsia iha Kosta Súl,” nia karesenta.

Governu EUA sei apoiu fundu milliaun $10 ba reabitasaun aeroportu Baucau.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here