Komandante Jerál PNTL, Komisáriu Faustino da Costa entrega sertifikadu ba komandante eskuadra na’in-65 ne’ebé remata kursu investigasaun iha Sentru Formasaun Polísia. Imajen/PNTL

DILI, 08 setembru 2020 (TATOLI)-Komandu Polísia Nasionál Timor-Leste (PNTL) kontinua kapasita nia membru no komandante sira iha area investigasaun.

Notísia Relevante : Polísia na’in-23 tuir formasaun dilijénsia investigasaun kriminál

Ohin, komandante polísia eskuadra na’in-65 kompleta ona sira-nia kursu investigasaun ne’ebé hala’o iha Sentru Formasaun Polísia.

Formasaun ne’e hala’o nu’udar rezultadu kooperasaun husi Sentru Formasaun Polísia ho Programa Dezenvolvimentu Polísia Timor-Leste (TLPDP) ne’ebé fornese servisu ho kualidade, disponivel, asesivel, no aseitavel, atu membru polísia too komandante sira halo investigasaun no rekolla dadus ho kualidade no konfiavel.

Komandante Jerál PNTL, Komisáriu Faustino da Costa, husu ba komandante eskuadra na’in-65 ne’ebé remata kursu fila fali ba munisípiu atu implementa esperiénsia ne’ebé sira hetan ba membru sira seluk.

Nia dehan, bainhira komandante sira fahe no implementa esperiénsia investigasaun ne’ebé sira hetan hodi aplika iha terrenu maka sei ajuda servisu PNTL nian atu implementa lei no próteze direitu sidadaun sira ne’ebé presiza justisa no presiza polísia nia tulun.

Komisáriu Faustino hato’o parabéns ba Komandante CFP ho ekipa tomak, no parseiru TLPDP ne’ebé apoia hodi realiza kursu ida ne’e.

Kursu investigasaun intervensaun komandante eskuadra iha prosesu dilijénsia ne’e hala faze datolu, kada aula ho partisipante na’in-20 resin no kursu ne’e hala’o durante semana ida nia laran.

Iha fatin hanesan, Komandante Sentru Formasaun Polísia,  Superintendente Xefe, Arquimino Ramos, informa, Komandante Eskuadra na’in-65 kompleta ona kursu investigasaun ne’ebé hala’o durante semana ida nia laran.

“Koñesimentu hirak ne’ebé ita boot sira hetan presiza atu imi halo iha imi nia atuasaun, desizaun no medida iha terrenu, liu-liu haree ba kazu ne’ebé atu investiga tenke ho atuasaun ne’ebé hanesan,” dehan Komandante Arquimino.

Superintendente Xefe, Arquimino hatutan, maioria komandante eskuadra sira partisipa kursu ne’e ho di’ak no sira barak iha esperiénsia barak no sira balu ne’ebé foun aproveita ho kursu hanesan ne’e bele fahe esperiénsia ba malu para sira bele iha hanoin ida de’it hodi halo atuasaun.

Nia hatutan, planu ba futuru Sentru Formasaun Polísia sei hala’o semináriu loron tolu konvida komandante munisípiu no unidade sira hodi haree kona-ba investigasaun kriminál, atu nune’e PNTL iha konseitu ida de’it nune’e atuasaun no medida tuir Kódigu Prosesu Penál Timor-Leste.

Segundu Komandante TLPDP, Mark Silvertand hateten, kursu ne’e importante ba komandante sira hodi hasa’e sira nia koñesimentu atu aplika servisu investigasaun iha terrenu ho susesu.

“Ita boot sira simu matéria, halo senáriu, no saida maka ita halo bainhira atende kazu ruma iha lokál  ba krime, relasaun ho servisu investigasaun ne’ebé polísia halo,” nia hateten.

TLPDP mós espera komandante eskuadra sira mai ho esperiénsia oi-oin no membru sira sei haree sira nia komandante nia esperiénsia sai hanesan ezemplár atu aplika servisu ho profisionál hodi kontribui ba dezenvolvimentu rekursu umanu membru no Instituisaun PNTL.

“Abilidade ne’ebé ita hetan hanesan koñesimentu fahe ba membru sira, nune’e sira mós bele konfia aan hodi halo atendimentu ba kazu ruma,” nia tenik.

Serimónia enserramentu kursu investigasaun ne’e kompleta ho entrega sertifikadu ba komandante eskuadra  na’in-65 ne’e.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here