Asidente tráfegu iha área Raicotu, Tasi-Tolu, Dili, rezulta vítima Santiago Marcelo husi Suku Aiasa, Postu Administrativu Bobonaro, Munisípiu Bobonaro mate iha fatin. Imajen Tatoli/Dok.

DILI, 08 setembru 2020 (TATOLI)- Asidente tráfegu ne’ebé akontese, ohin, purvolta tuku 14:30 iha área Raicotu, Tasi-Tolu, Dili, rezulta vítima Santiago Marcelo husi Suku Aiasa, Postu Administrativu Bobonaro, Munisípiu Bobonaro mate iha fatin.

Asidente ne’e akontese, hafoin vítima Santiago ho nia motór privadu marka Honda Revo xapa N-4104 tula nia kaben Liliana dos Santos husi uma Beto-Comoro ba servisu fatin iha Loja Xineza iha área Eskola São Miguel nia oin.

Hafoin hatún tiha nia kaben Liliana, vítima ho motór atu fila fali, derrepente too iha área estrada públiku arredores Organizasaun Naun Governmental (ONG) FUTURU nian maka rezulta soke husi karreta fuso boot ida husi kompañia balun tula ekipamentu infraestrutura hodi halo vitima ulun-fatuk nakfera no mate iha fatin akontesimentu.

Asidente tráfegu iha área Raicotu, Tasi-Tolu, Dili, rezulta vítima Santiago Marcelo husi Suku Aiasa, Postu Administrativu Bobonaro, Munisípiu Bobonaro mate iha fatin. Imajen/Agapito dos Santos

Tuir observasaun Agência Tatoli nian iha lokál akontesimentu nota katak, akontesimentu halo vítima nia kaben, Liliana akompaña husi família no kolega sira balun ne’ebé asiste hodi haree direita akontesimentu trauma maka’as no tanis de’it.

Matebian nia kaben, Liliana dos Santos haktuir katak, iha meudia tuku 12:00 Otl, vítima ba tula nia hodi fila ba uma han meudia, nune’e iha fali tuku 14:30, vítima tula fali nia ba hatún iha servisu fatin no fila la too minutu 10, nia parte rona dehan karreta soke mate ona nia kaben.

“Iha tuku 14:30 Otl, nia lori ha’u mai servisu no nia atu fila fali ba uma ne’e mak dehan karreta soke mate,” Liliana  hateten ho tanis.

Vítima Santiago mate husik hela nia oan na’in-tolu, kompostu husi feto na’in-rua no mane na’in-ida ne’ebé hela iha sira nia uma.

Iha akontesimentu ne’e, motorista ne’ebé lori karreta ne’e halai ba entrega aan kedas iha Postu Polísia Unidade Espesiál Polisia (UEP) iha Rotunda Nicolau Lobato Comoro, Dili.

Parte Polisia Seksaun Tránzitu Postu Eskuadra Comoro mós too kedas iha fatin akontesimentu hodi sukat no tula kedas mate isin ba Ospitál Nasionál Guido Valadares (HNGV).

Iha observasaun mós nota, parte Bombeiru Comoro Dili mós too kedas iha fatin hodi rega vítima raan ne’ebé fakar iha estrada laran.

Too notísia ne’e hatún, Tatoli tenta konfirma asuntu ne’e ba Komandu PNTL Dili seidauk bele fó komentáriu, tanba sei hein hela relatóriu investigasaun kompleta husi Polísia Eskuadra Comoro.

Jornalista   : Eugénio Pereira /Agapito dos Santos

Editór        : Francisco Simões

HAKEREK NO HATÁN

Please enter your comment!
Please enter your name here