Inan Feton sira kous hela sira nia oan wainhira partisipa iha selebrasaun semana Mundial susuben Inan Nian, iha Salaun Ministeriu Saude Kaikoli Dili 7 Agusto 2019.Imajen/ Media Ministerio Saude

DILI, 08 setembru 2020 (TATOLI)-Dirijente sira husi Ospitál Nasionál Guido Valadares (HNGV-sigla portugés) hamutuk ho Organizasaun Mundiál Saúde (OMS) halo sensibilizasaun informasaun ba seguransa sira atu alerta ba pasiente sira liliu inan sira atu evita fó bibiron ne’ebé ense susuben formula ba bebé bainhira halo tratamentu saúde iha  HNGV.

“Pesoál seguransa sira mak hamrik iha portaun hodi simu pasiente no visitór sira ne’ebé mak moras iha HNGV para fó informsaun ba iha komunidade sira katak ospitál hadomi kosok oan ne’ebé la autoriza família sira lori bibiron no supeta no susuben formula hodi tama ba ospitál hodi fó ba kosok-oan ne’ebé mak foin moris,” dehan Xefe Gabinete Kontrolu Kualidade, Sara Maria Xavier, ba jornalista sira iha HNGV tersa ne’e.

Tuir nia susuben formula risku ba bebé sira foin moris tanba bele hamosu moras diarea, infesaun vias respiratóriu  no seluk tan.

“Tanba ne’e mak durante bebé moris mai iha fulan neen nia laran sei autoriza de’it fó susu been inan nian ba bebé,” katak nia.

Depois fulan neen, sujere ba inan sira atu kontinua fó susu been inan  to’o bebé tinan rua  no akompaña ho aihan seluk ne’ebé iha nutrisaun di’ak hanesan sasoro tein ho senoura, fehuk roupa, manutolun inklui modo tahan hodi dezenvolve sira nia fiziku no mentalidade.

“Akontese dala barak família sira lori bibiron maibé pesoál saúde sira fó hanoin no esplikasaun depois foti tiha susu ben formula ne’ebé familia sira lori entrega filafali depois fo mós edukasaun saúde para labele fó susuben formula ba bebé sira ne’ebé foin moris,” nia hatutan.

Desizaun hapara fó bibiron no susuben formula ba bebé iha HNGV ne’e baseia ba orientasaun maihosi Ministériu Saúde ninian, no iha posibilidade sei implementa mós iha Sentru Saúde sira iha territóriu Timor-Leste.

Entretantu, formasaun ne’e hala’o durante loron tolu, komesa ona iha loron 07 to’o 09 fulan-setembru ne’e ba partisipante hamutuk 58.

Jornlista : Felicidade Ximenes

Editór     : Agapito dos Santos

HAKEREK NO HATÁN

Please enter your comment!
Please enter your name here