Prezidente CFP, Faustino Cardoso Gomes. Imajen Tatoli/Egas Cristovão

DILI, 08 setembru 2020 (TATOLI)-Prezidente Komisaun Funsaun Públika (CFP, sigla portugés), Faustino Cardoso Gomes, esplika Lei númeru 12/2016 seguransa sosiál, la mensiona funsionáriu ne’ebé ho idade 60 ba leten tenke reforma, tanba ne’e CFP rasik labele obriga ema atu reforma maibé depende ba rekerimentu.

“Atu tama ba reforma ka lae, depende ba idaidak ninia rekerimentu no bainhira rekerimentu ne’e tama Komisaun Funsaun Públika, sei prosesa no enkamiña ba Institutu Nasionál Seguransa Sosiál (INSS) hodi prosesu hetan seguransa sosiál ba situasaun sira idaidak,” tenik Prezidente CFP, hafoin hasoru malu ho Primeiru-Ministru, Taur Matan Ruak, iha Palásiu Governu, tersa ne’e.

Dirijente ne’e dehan, durante ne’e akontese iha funsionáriu ne’ebé ho idade reforma 60 ba leten maibé seidauk prontu reforma.

“Ami labele obriga sira tanba lei la fó dalan, depende ba ema idaidak ninia hakarak no bainhira nia dehan sei iha kbiit atu serbisu entaun sei bele kontinua,” nia akresenta.

Tuir Faustino Cardoso, CFP iha ona hanoin atu altera lejizlasaun, maibé presiza komunika ho orgaun kompetente sira.

“Atu aplika kuandu halo alterasaun ba Lei númeru 12/2016, maibé ne’e kompeténsia Parlamentu Nasionál. KFP halo ona komunikasaun ho sira atu haree nune’e iha funsaun públiku ne’ebé korreesponde ho situasaun demográfika no situasaun Timor-Leste ne’ebé maioria domina ho idade joven. Do que funsaun públika ida iha katuas-ferik orsida serbisu matan dukur hela de’it no lakon ona produtividade,” nia subliña.

Entretantu, to’o 2019 funsionáriu públiku inklui ajente administrasaun públika hamutuk 33.031 no hosi númeru ne’e na’in-28.000 resin nu’udar funsionáriu permanente, enkuantu sira seluk hanesan funsionáriu kontratadu nu’udar ajente administrasaun públiku no la konta ho funsionáriu kazuál.

Funsionáriu kazuál iha funsaun públika daudaun ne’e pur volta 6.000.

 Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here