Primeiru-Ministru, Taur Matan Ruak prezide reuniaun dahuluk CCARI, iha Palásiu Governu, segunda (07/09). Imajen Tatoli/Egas Cristovão

DILI, 07 setembru 2020 (TATOLI)Primeiru-Ministru (PM), Taur Matan Ruak, prezide reniaun dahuluk ba Komisaun Koordenasaun no Akompañamentu Reforma Institusionál (CCARI, sigla portugés) atu halo reforma institusionál.

“Komisaun Koordenasaun no Akompañamentu Reforma Institusionál ne’e kria ho baze ba Rezolusaun Governu ho númeru 29/2020, 19 agostu ho  objetivu atu halo koordenasaun ka sai subriña ne’ebé maka tau-matan ba prosesu reforma hotu ne’ebé mak la’o iha Governu laran no reforma ne’ebé mak la’ós iha Governu nia laran,” tenik Ministru Prezidénsia Konsellu Ministru, Fidelis Manuel Leite Magalhães, hafoin reniaun dahuluk CCARI iha Palásiu Governu, segunda ne’e.

CCARI ninia komposizasaun lidera hosi Xefe Governu, Ministru Prezidénsia Konsellu Ministru Fidelis Manuel Leite Magalhães, Ministru Finansa Fernando Hanjam, Ministru Justisa Manuel Cárceres Da Costa, Ministru Administrasaun Estatál Miguel Pereira De Carvalho no Gabinete Reforma Administrativa hosi Prezidénsia Konsellu Ministru (PCM, sigla portugés).

Notísia Relevante: Governu Hahú Diskute Mekanizmu Implementasaun Reforma Institusionál

Governu kria komisaun koordenadora no akompañamentu reforma institusionál

Governante ne’e esplika, serbisu komisaun ne’e maka sei tau matan bainhira iha inisitiva iha reforma administrasaun públika, reforma fiskál no jestaun finaseira iha Ministériu Finansa, inklui prosesu desentralizasaun no reforma judisiáriu.

“Iha komponente haat mak atu reforma no la’o hela, komisaun koordenasaun ne’e sei tau matan hotu ba inisiativa reforma sira hotu atu nune’e sei hasoru malu dala-ida kada fulan-rua,” nia akresenta.

Iha enkontru kada fulan-rua, membru CCARI sira sei hato’o dezempeñu no lala’ok serbisu ba komisaun, liuliu ba Xefe Governu atu akompaña hodi fó orientasaun ruma atubele aselera lala’ok reforma sira ne’ebé la’o hela.

Iha rezolusaun ne’e, mós ejize ba membru sira atu iha loron 120 nia-laran bele hato’o programa ida mai komisaun koordenasaun atu iha meiu ida sai sasukat atubele akompaña reforma sira ne’ebé akontese hela.

“Ita husu membru sira hatama programa no husu atu iha espetativa ida atu inklui roteiru kalendáriu ba oin no estimativu kustu ba inisiativa bainhira atu realiza programa,” nia subliña.

Kriasaun komisaun koordenasaun sei responsável estabelese diresaun no vizaun jerál reforma ka programa nian, koordena dezeñu, programasaun no implementasaun konsistente reforma ne’e atu promove sinerjia no kooperasaun entre reforma sira, halakon obstákulu no sobre pozisaun entre reforma sira, fornese apoiu polítiku ba reforma sira no garante dezempeñu no implementasaun reforma ho di’ak.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here