Membru PNTL sira hasai fotografia hamutuk ho parseiru sira. Imajen/Eugénio Pereira

DILI, 07 setembru 2020 (TATOLI) – Uniaun Europeia (UE) servisu hamutuk ho Inisiativa Spotlight fó apoiu fundus ba Komandu Polísia Nasionál Timor-Leste Unidade Ema Vulneravel (PNTL-VPU) hodi realiza kursu kombate krime violasaun seksuál (VS) no abuzu seksuál (AS) ba menoridade hodi mellora servisu investigasaun.

Embaixadór Uniaun Europeia (UE) mai Timor-Leste, Andrew Jocabs, dehan sira orgullu hodi apoia PNTL-VPU liuhusi finansiamentu  Inisiativa Spotligt ho objetivu atu hapara violénsia hotu- hotu kontra feto no labarik feto sira.

Inisiativa Spotlight ne’ebé UE finansia iha Timor-Leste sei kontribui atu elimina violénsia bazeia ba jéneru liuhusi esforsu iha área lima hanesan, lejizlasaun no polítika, fortalesimentu institusionál, prevensaun violénsia, fornese servisu ho kualidade ne’ebé disponivel, asesivel, no aseitavel, rekolla dadus ho kualidade no konfiavel no apoia movimentu feto sira no mós organizasaun sosiedade sivíl.

Inisiativa Spotlight hanesan parseria globál konjunta entre UE no Organizasaun Nasoins Unidas (ONU), atu envolve ema hotu- hotu, feto no mane sira, lider formal no informa, instituisaun no individuál sira, atu kria ambiente favoravel ida, hodi hapara kualkér forma ba violénsia bazeia jéneru, liu-liu violénsia doméstika no violénsia íntimu husi parseiru ho objetu jerál atu fortalese feto no labarik feto sira iha sosiedade Timor-Leste.

“Ha’u laran haksolok tebes, ohin mai iha ne’e, hodi sai sasin ba implementasaun inisiativa sportligth nian iha Timor-Leste ne’ebé maka Uniaun Europeia rasik kontribui diretamente Millaun $13,2,” hateten Embaixadór UE Andrew liuhusi nia diskursu bainhira partisipa abertura formasaun iha Akademia PNTL, Comoro, Dili.

Abuzu seksuál ba labarik sira, sai sériu tebes iha nasaun barak. Iha tinan hirak kotuk, kazu violénsia no abuzu seksuál ba labarik sira aumenta maka’as tebes halo ema hotu hafodak atu servisu makas kombate krime hirak ne’e.

Tuir relatóriu ne’ebé públika, foin lalais ne’e, husi EUROPOL, surtu COVID-19 ne’ebé akontese daudaun ne’e fó mós risku ba esplorasaun seksuál ba labarik sira. Labarik sira ne’ebé gasta tempu barak liu halo online, no dala barak sira esporta mós ba predadór online sira.

Embaixadór Andrew Jocabs hatutan, labarik sira ne’ebé moris hamutuk ho abuzador sira, iha izolamentu ne’ebé liga ho krize COVID-19, labarik sira hetan konsekuénsia ne’ebé dramátiku tebes. Tanba ne’e, EU hakarak ema hotu luta hasoru violénsia no abuzu seksuál ba labarik sai ona prioridade importante ida ba UE.

Abuzu ba labarik no trauma, sai mós buat ida ne’ebé esternu tebes iha Timor-Leste. Iha tinan 2016 Estudu ne’ebé Organizasaun Mundiál Saúde (OMS) hala’o, indika katak, labarik na’in tolu husi kada labarik feto no mane na’in lima, relata sira hetan violasaun fíziku ba abuzu seksuál, bainhira sira sei idade labarik.

Tuir relatóriu husi Word Vision ne’ebé publika iha tinan kotuk, hatudu, 30% labarik feto adolexente iha Timor-Leste hetan esperiénsia ba violénsia fíziku, no tuir estimasaun iha labarik mane 75%, no labarik feto porsentu 67% hetan esperiénsia kastigu fíziku. Kondisaun difisil liután ba grupu vulneravel seluk, hanesan labarik ne’ebé ho defisiénsia, no 72% husi ema ho defisiente, sira nunka partisipa iha eskola.

Tuir Revizaun Periódika Universal, ne’ebé hala’o hosi Konsellu Diretu Umanus ba Timor-Leste, relata iha tinan 2016 katak, violénsia uitoan de’it, no kazu abuzu seksuál ba labarik uitoan liu maka hetan prosesa iha tribunál, no vítima sira ne’ebé ho idade labarik, dala barak la’ós sira maka iha pozisaun atu husu tulun ba autoridade ofisiál sira ne’ebé makai ha sistema justisa nia laran.

Ho problema sira ne’e hotu, UE kontinua koopera ho parseiru sira hala’o ona servisu barak hodi hadi’a situasaun ne’ebé refleta ba violasaun no abuzu seksuál ba labarik sira iha Timor-Leste. Iha ona estrutura legál no enkuadramentu polítika no implementasaun iha ona progresu laran.

Timor-Leste mós iha ona Planu Estratéjia Nasionál ba Labarik. Iha mós lei hodi próteze labarik sira, husi violénsia oin-oin buat barak hala’o ona hodi hasa’e konsiénsia públiku, atu oinsá prosesa ka lori suspeitu sira ne’ebé hala’o violénsia seksuál no abuzu labarik sira iha tribunál.

UE mós nota, iha dezafiu barak, no sei iha buat barak tebes mak atu hala’o hodi asegura katak, ema hotu iha koñesimentu ba naha todan husi krime hirak ne’e, no dezafiu ida ne’ebé difisil liu maka oinsá atu muda ema nia hanoin. Ema presiza atu ko’alia sai, bainhira sira suspeita iha abuzu seksuál ruma ba labarik sira iha uma laran. Sira tenke halo ema hatene katak, ba abuzu seksuál ba labarik sira sei hato’o keixa no ema sei hetan kastigu.

Embaixadór UE Andrew Jocabs husu ba PNTL atu halo ninia papél hodi servisu ho parseiru sira, governu hodi buka kombate krime hirak ne’e.

Iha fatin hanesan, reprezentante Rezidente PNUD, Munkhtuya Altangeral hato’o agradese bele servisu hamutuk ho PNT-VPU hodi realiza formasaun ba investigadór sira.

Munkhtuya Altangeral dehan, Inisiativa Spotlight durante ne’e servisu maka’as tebes atu elimina violénsia kontra feto no labarik feto sira.

Tuir relatóriu iha tinan 2019 ne’ebé Word Vision ho nia parseiru sira iha nasaun ualu (8) inklui TL identifika 87.4% husi labarik sira hamutuk na’in-612.00 mak hetan violénsia fízika no emosionál iha uma Timor-Leste.

Inisiativa Spotlight ne’ebé Uniaun Europeia-Agência ONU nian lima maka implementa inisiativa ne’e iha Timor-Leste fó kbiit ba instituisaun nasionál oin-oin hanesan PNTL atu hakotu violénsia hasoru labarik sira no forma violénsia hotu iha família laran.

Formasaun ne’ebé organiza tuir Inisiativa Spotlight husi PTNL ho apoiu husi PNUD, sei foka ba ofisiál PNTL nia VPU no pesoál sia iha Centro Formasaun Polísia (CFP).

Formasaun ho durasaun semana rua ne’e mak pontu arranka ida atu posibilita PNTL hodi halo investigasaun ba kazu oin-oin kona-ba abuzu ba labarik, insestu, no asaltu seksuál hasoru labarik sira.

Formasaun ne’ebé lansa ohin sei hetan apoiu husi Polisia Federal Austrália (AFP), parseiru longu prazu ida ba PNTL liuhusi ninia Programa Dezenvolvimentu Polísia Timor-Leste (TLPDP).

Iha parte seluk, Komandante Servisu Investigasaun Kriminál Nasionál (SIKN), Superintendente Xefe, José M. Neto Moc hato’o agradese ba apoiu husi parseiru dezenvolvimentu hodi ajuda investigasaun PNTL-VPU.

Kursu ne’e envolve investigadór polísia feminina hamutuk na’in-11 liuhusi SIKN no VPU nian.

“Kursu ida ne’e importante tebes atu kapasita ita nia membru sira atu halo investigasaun ida di’ak ho profisionál, liu-liu haree ba kazu violénsia  doméstika ne’ebé kada tinan rejistu ho númeru aas,” Superintendente Xefe, José M. Neto Moc hateten.

Entretantu bainhira jornalista husu kona-ba númeru kazu krime Violénsia Seksuál no Abuzu seksuál ne’ebé komandu PNTL rejista durante tinan 2019 no tinan 2020, Komandante José M. Neto Moc labele fó komentáriu, tanba seidauk halo rekapitulasaun ba dadus husi munisípiu hotu.

Ba oin, PNTL sei koopera nafatin ho TLPD hodi kapasita nafatin membru sira iha área investigasaun krime jerál no krime seluk tan ne’ebé sempre akontese iha Timor-Leste.

Serimónia ne’e partisipa direita husi Vice Ministériu Interiór António Armindo no Segundu Komandante Jerál PNTL, Komisáriu Mateus de Jesus.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here