Sekretáriu Estadu Kooperativa, Elizário Ferreira. Imajen Tatoli/Jogerjo Guterres

DILI, 07 setembru 2020 (TATOLI)-Sekretaria Estadu Kooperativa (SEKoop), planea atu realiza hikas espoziasaun hodi promove produtu kooperativa iha loron nasionál Timor-Leste.

“Iha ona hanoin aproveita mós loron nasionál sira hanesan Proklamasaun Indepedénsia iha 28 novembru, bele hala’o espozisaun atubele komemora loron istóriku no aproveita promove mós produtu rai-laran hanesan meiu ida eduka povu atu hadomi produtu no kontribui ba redusaun nesesidade bázika hosi rai-li’ur,” tenik Sekretáriu Estadu Kooperativa, Elizário Ferreira, hafoin relata progresu serbisu SEKoop ba Primeiru-Ministru, Taur Matan Ruak, iha Palásiu Governu, segunda ne’e.

Notísia Relevante: Enserra espozisaun, SEKoop planu organiza tan atividade promove produtu kooperativa
Governante nota katak, iha espozisaun ba promosaun produtu kooperativa ne’ebé realiza durante loron-10 hahú 20 to’o 30 agostu, iha ámbitu komemorasaun tinan 45 Frente Armada Libertasaun Timor-Leste (FALINTIL) no tinan 21 Loron Konsulta Populár ka Referendu, envolve negosiante ki’ik barak no hetan benefísiu.

“Iha loron hirak liubá, SEKoop realiza espozisaun ida ho objetivu atu promove produtu hosi kooperativa ki’ik sira. Hosi avaliasaun progresu espozisaun ne’e hatudu buat pozitivu tanba negosiante barak maka hetan benefísiu durante loron-10 ne’e, tanba ne’e maka iha hela hanoin katak sei kontinua,” nia subliña.

SEKoop planea sei realiza espozisaun iha ámbitu komemorasaun loron espesiál Timór nian hanesan Loron Proklamasaun Independénsia 28 novembru 2020, ne’ebé atividade sei hahú iha loron 20 novembru 2020.

Antes ne’e, negosiante hamutuk 87 maka harame espozisaun produtu kooperativa ne’ebé realiza iha Fundasun Hanai Malu, Bairro Pité.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here