Imajen/Media PR.

DILI, 07 setembru 2020 (TATOLI)—Prezidente Repúblika, Francisco Guterres ‘Lú Olo’, agredese ba felisitasaun hosi entidade hotu-hotu ne’ebé hato’o kongratulasaun ba ninia aniversáriu ba dala-66 (07 setembru 1954-07 setembru 2020).

“Ho ha’u-nia naran no família nia naran, ha’u agredese felisitasaun hotu-hotu ne’ebé ha’u simu iha ha’u-nia loron-moris. Imi-nia amizade no estima ba ha’u iha folin aas tebes no ha’u haksolok ida-ne’e iha momentu hotu-hotu tanba fó forsa no korájen ba ha’u hasoru dezafiu sira iha vida no iha jornada ne’ebé ha’u simu bainhira ha’u kandidata-aan ba knaar Xefe Estadu iha 2017,” dehan Prezidente Repúblika, Francisco Guterres ‘Lú Olo’, iha ninia aniversáriu ba dala-66 liuhosi komunikadu imprensa ne’ebé Agência TATOLI asesu liuhosi funpage Presidéncia da República Democrátika de Timor-Leste, segunda ne’e.

Xefe Estadu ne’e hateten, ho esforsu tomak nia sei hala’o nafatin nia knar ba oin hanesan Prezidente ba ema hotu-hotu ho ema hotu-hotu nia apoiu ho konsistente no ba beibeik.

“Ho esforsu  di’ak liu mak ha’u sei hala’o nafatin ha’u-nia knaar ba oin no  nu’udar Prezidente hotu-hotu nian no ba ema hotu, ho imi-nia apoiu konsistente no babeibeik. Ba imi hotu-hotu, ha’u-nia hako’ak fraternu ho amizade,” Prezidente Lú Olo hateten.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here