Membru Front Rakyat Maubere Untuk West Papua (FRM-WP) sira detein iha sela detensaun atu submete ba primeiru interrogatoriu iha Tribunal Distritál Dili (TDD). Imajen/Foti husi Facebook

DILI, 07 setembru 2020 (TATOLI) – Komandu Polísia Munisípiu Dili halo ona investigasaun ba membru Front Rakyat Maubere Untuk West Papua (FRM-WP) na’in-16 ne’ebé halo asaun manifestasaun iha resintu Embaixada Repúblika Indonézia nian iha Timor-Leste, foin lalais ne’e.

Estudante sira ne’e, PNTL detein iha sesta (4/9), tuku 10:00 dadeer, tanba halo manifestasaun solidariedade hodi apoia povu Papua mas la ho karta koñesimentu ba Komandu PNTL.

Segundu Komandante Munisípiu Dili, Superintendente Euclides Belo, haktuir membru FRM-WP viola regra manifestasaun iha artigu 5 lei númeru 1/2006.

“Ita investiga ona ita nia juventude Timoroan mai husi universidade oioin ne’ebé hamahan aan iha Front Rakyat Maubere Untuk West Papua (FRM-WP) hamutuk na’in-16, tanba halo fali manifestasaun iha Embaixada Indonézia nia oin”,  dehan Euclides Belo ba jornalista, ohin iha Komandu Polísia, Kaikoli.

Estudante sira-ne’e nia kazu PNTL sei prosesa ba Ministériu Públiku, tanba viola regra manifestasaun iha lei númeru 1/2006 iha artigu 5, kona-ba restrisaun ninian ka metru 100 husi edifísiu públiku sira.

“Ita orienta detein sira, tanba viola regra manifestasaun nian iha lei númeru 1/2006 iha artigu 5, kona-ba restrisaun ninian ka metru 100 husi edifísiu públiku”, nia hateten.

Euclides hatutan, antes ne’e FRM-WP halo duni pedidu ba PNTL atu halo asaun pasífika, maibé PNTL sujere sira atu halo asaun iha kampu Tasi-Tolu no estudante sira la kumpre regra.

Daudaun ne’e membru FRM-WP na’in-16 sei detein iha sela PNTL Kaikoli durante oras 72 molok aprezenta ba Ministériu Públiku.

Antes ne’e, reprezentante Front Rakyat Maubere Untuk West Papua (FRM-WP), Miguel Arcanjo Moniz Silva, deklara asaun ne’e sira halo hodi kontra informasaun ne’ebé fó sai hosi Embaixada Indonézia nian kona-ba problema Papua nian.

Tuir istória Repúblika Indonézia invade Papua iha loron 19 dezembru 1963 no povu Papua rasik ho sira nia lideransa Zeht Jafeth Rumkorem deklara sira hakarak independénsia hahú kedas ona iha loron 1 dezembru 1961 no too ohin sei kontinua luta nafatin.

Jornalista  : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here