Ofisiál Programa Saúde Mentál Ministériu Saúde, Anabela Guterres, Imajen/Felicidade Ximenes.

DILI, 07 setembru 2020 (TATOLI)-Ofisiál Programa Saúde Mentál Ministériu Saúde, Anabela Guterres, hateten kazu oho aan ne’ebé daudaun ne’e akontese iha Timor-Leste la’ós ema ho moras mentál maibé sidadaun normál ho presaun psikolólika tanba ne’e presiza rezolve problema ho ulun malirin.

“Ema sira ne’ebé hili dalan oho aan ne’e la’ós mai ho problema moras mentál maibé presaun psikolójiku,” informa nia ba jornalista sira iha nia knaar fatin Eis SPK Lahane, segunda ne’e.

Atu tulun joven sira hodi evita husi kazu oho aan liuhosi forma oioin maka Governu liuhosi Ministériu Saúde iha tempu badak sei sensibiliza informasaun ba estudante sekundáriu no universitáriu atu oinsá halo prevensaun.

”Entaun ami-nia planu ami atu tama sai eskola sekundáriu no univernsidade sira para atu halo sensibilizasaun ba sira kona-ba tentativa oho aan tanba dalabarak joven feto sira barak mak oho sira-nia aan rasik,” dehan Ofisiál Programa Saúde Mentál,  Anabela Guterres, ba jornalista sira

Kazu oho aan dala barak akontese ba joven feto sira tanba presaun psikolójiku hafoin isin rua no mane lakohi responsabiliza ba aktu ne’e hodi hili dalan ida maka tara aan.

“Tanba ne’e mak ami iha ona planu no koordena ona ho Doutór no mós  pradet ne’ebé mak tau matan ba tentaiva oho aan sira ne’e para fahe informasaun ba joven sira para hodi hatene liután tentativa sira ne’e,” tenik tan.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here