Pedro UNAMET Rodrrigues hasai retratu hamutuk ho Eis Xefe UNAMET, Ian Martin, bainhira selebra loron Konsulta Populár ba dala-20 (201). Imajen/Espesiál.

Iha tinan kotuk (2019), Eis Xefe UNAMET Ian Martin ho ministru balun mai to’o ami-nia fatin no ha’u rasik husu ba sira katak atu ajuda Pedro UNAMET. Maibé, sira dehan kompeténsia Ministériu Edukasaun Juventude no Desportu (MEJD) nia liman. Mak ami hein to’o agora mós Governu liuliu MEJD laiha resposta ida. Maibé, ami kontinua esforsu hodi bele haree ami-nia oan nia eskola.

DILI, 07 setembru 2020 (TATOLI)—Iha loron 07 setembru kada tinan fó hanoin fali akontesimentu ida ne’ebé akontese ba família Joana Freitas de Sousa (tinan 20) no Simplicio (tinan 17). Kada loron 7 setembru, Joana Freitas de Sousa sempre hanoin fali kona-ba loron segunda (07 setembru 1999) kalan iha biban ne’ebá, bainhira ninia oan-mane dahuluk (primeiru filho), Pedro UNAMET, moris hodi tanis no haree mundu ba dahuluk.

Iha momentu ne’ebá, membru militár Tentara Nasional Indonesia (TNI) no membru milísia pro-integrasaun sira tiru kilat tarutu iha bairru sira iha Dili laran tomak. Milísia la’o ba-mai nakonu iha Dili nia sikun-sikun. Família Simplicio no Joana Freitas de Sousa hanesan família sira seluk iha Timor-Leste, hamahon-aan iha Sede UNAMET durante loron hirak nia laran hafoin membru milísia pro-intergrasaun haleu no atake fatin sira helik ka subar ba, entuan sira tenke halai buka salva-aan ba iha Sede UNAMET nia alaran.

Sede UNAMET sai hanesan fatin ba timoroan sira atu proteje aan liuliu servisu na’in (staff) ONU nian, no kuaze timoroan 800 no 900 mak mai salva-aan iha fatin refere. Sede UNAMET iha Balide ne’e nakonu ho ema barak be barak. Timoroan feto no mane, ferik eh katuas, labarik no foinsa’a sira, sira salva-aan hodi haksoit liu moru naruk ne’ebé satan netik ho arame be kro’at. Iha sitausaun defisil no kruel ne’e, iha Sede UNAMET mós menus ba bee-moos.

Situasaun ida-ne’e akontese bainhira povu Timor-Leste fó votu hodi hili Timor-Leste nia independénsia liuhosi Konsulta Populár iha 30 agostu 1999 no iha loron 04 setembru 1999 ne’ebé anunsia rezulatdu votasaun, ne’ebé povu Timor-Leste 78,5% hili independénsia. Rezultadu votasaun ne’e halo situasaun iha Timor-Leste hetok manas no manas ahi-klaak no kruel be kruel. Membru milísia sira hahú hala’o asaun brutal hodi sunu uma no oho timoroan pro-independénsia sira ho taka matan.

Iha situasaun ida be kruel, Maromak boot, hosi inan-feton ida ne’ebé ho isin-rua todan refujia iha Sede UNAMET nia laran, Joana Freitas de Sousa, nia knotak momoos moris kosok-oan Pedro UNAMET ne’ebé moris iha Sede UNAMET laran, iha loron 07 setembru 1999 iha tuku 03:15 madrugada (dadeersan) iha rai nakukun nia laran. Iha fatin ne’e, iha Sede UNAMET ne’e nia laran, Pedro UNAMET moris mai hodi haree mundu nia furak. Iha biban ne’e, Pedro UNAMET hanesan hakat tuun hosi “lalehan moris nian” iha situasaun ema tiru kilat no sunu uma nia leet, be lori akompaña Pedo UNAMET nia hakat hodi sama ain iha mundu ne’e ba dahuluk.

Joana Freitas de Sousa. Imajen TATOLI/Osória Marques.

“Ha’u sente triste no tauk tanba ha’u-nia oan iha isin hela, hein de’it ona loron rua tolu atu tuur-ahi. Entaun, ha’u ho família halai ba UNAMET nia fatin iha eskola 4 setembru Balide ne’e. Depois loron 7 setembru, ha’u partus. UNAMET nia boot Ian Martin ajuda no fatin espesiál ida ba ha’u hodi hela durante semana ida. Maske ha’u partus iha situasuan defisil nia-laran maibé sente kontente tanba UNAMET ajuda ha’u hodi ha’u bele tuur-ahi. Ha’u mós kontente tebes bainhira rona dehan ita Timor ukun rasik-aan ona no bele kore-aan hosi invazór rezime Soeharto,” dehan Joana Freitas de Sousa ba Agência TATOLI iha ámbitu komemora Loron Konsulta Populár ba dala-21 (30 agostu 1999-2020) iha nia rezidénsia Santa Crus, Dili, tersa (02 setembru 2020).

Joana haktuir, Pedro UNAMET Rodrigues, moris iha Sede UNAMET, Balide, Dili, iha loron 07 setembru 1999 iha tuku tolu minutu 15 (03:15) madrugada. Iha momentu ne’e kedas amu australianu ida, Pe. Piter Hosking fó sarani kedas ho naran Pedro UNAMET Rodrigues.

Nia dehan, naran Pedro ne’e maihosi naran Piter tanba amu Piter nia naran ne’e ho língua Inglés maibé muda tuir naran Timor mak Pedro, entaun amu Piter Hosking deside tau naran ba kosok-an ne’e sai Pedro UNAMET. Naran-tutun (apalidu) UNAMET ne’e tanba moris iha UNAMET sira-nia fatin no UNAMET nia apoiu mak bele salva labarik ne’e hosi situasaun defisil nia laran.

Maski agora halo ona tinan-21 maibé Joana Freitas de Sousa hanoin hikas fali katak bainhira partus ne’e, nu’udar inan, Juliana la sente tauk tanba iha UNAMET mós iha doutór ida hosi França no enfreimeira ida naran Emiliana hosi Liberia no padre Jesuita Peter Hosking ne’ebé mak atende nia ho di’ak, hodi fó partus no hahan no sasán labarik nian inklui fasilita família nia nesesidade.

Liu tiha semana ida, nia haktuir, situasaun kontinua manas entaun Nasaun Unida (UN) lori ami ba Darwin-Australia hodi hela iha ne’ebá durante fulan neen (6) nia laran. Hafoin ne’e, nia dehan, nia fila-fal mai iha Timor-Leste no sente haksolok liu tanba nia bele fila hamutuk ho família to’o ohin loron.

Daudaun ne’e, Pedro UNAMET Rodrigues, akaba ona nia estudu iha nivel sekundária nian iha Ensinu Sekundária 04 Setembru UNAMET. Iha biban ne’e daudaun, nia infroma, Pedro UNAMET tuir hela kursu inglés iha Lorosa’e English Language Institute (LELI) Fatuhada hodi hasa’e ninia konesementu no kapasidade iha parte lingua nian.

Kursu inglés ne’e, Joana Freitas de Sousa haktuir, Eis Xefe UNAMET iha Timor-Leste, Ian Martin, mak fó apoiu. Apoiu ne’e Ian Martin fó tanba Pedro UNAMET labele kontinua ninia estudu iha Ensinu Superiór, tanba kapasidade finanseira mak ladún ajuda hodi labele kontinua eskola ba universidade.

“Tanba ita hatene katak universidade ne’e selu karun. Só Universidade Nacional Timor Lorosa’e (UNTL) mak baratu maibé tinan kotuk nia tuir teste la passa. Entaun, Pedro UNAMET Rodrigues labele kontinua. Maibé iha parte seluk ami la nonok de’it, ami esforsu nafatin liuhosi negósiu halo no faan kaisaun maibé kaisaun la folin tanba Dili ema kuaze halo negósiu kaisaun nian,” nia dehan.

Tanba ne’e, nu’udar inan, nia husu ba Governu atu tau-matan netik ba nia oan Pedro UNAMET tanba nia moris iha tempu ida-ne’ebé mak defisil nia-laran. Pedro UNAMET moris iha tempu ne’ebé mak ema hotu buka atu salva nia vida maibé nu’udar inan tenke salva nia iha knotak (kabun laran) to’o moris. Tanba ne’e, tuir loloos ne’e, Pedro UNAMET mós bele hetan apoiu hosi Governu.

“Iha tinan kotuk (2019), Eis Xefe UNAMET Ian Martin ho ministru balun mai to’o ami-nia fatin no ha’u rasik husu ba sira katak atu ajuda Pedro UNAMET. Maibé, sira dehan kompeténsia Ministériu Edukasaun Juventude no Desportu (MEJD) nia liman. Mak ami hein to’o agora mós Governu liuliu MEJD laiha resposta ida. Maibé, ami kontinua esforsu hodi bele haree nia eskola,” Joana Freitas de Sousa hateten.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here