Ministru Turizmu, Komérsiu no Indústria, José Lucas do Carmo Silva. Imajen Tatoli/Egas Cristovão

DILI, 07 agostu 2020 (TATOLI)VIII Governu Konstitusionál hahú halo planu atu kria diploma ministeriál konjuta atu hamutuk dezenvolve, asegura no halo jestaun ba sítiu turístiku sira iha Timor-Leste.

Ministru Turizmu, Komérsiu no Indústria, José Lucas do Carmo Silva, informa daudaun ne’e Ministériu Turizmu, Komérsiu no Indústria (MTKI) koordena hamutuk Ministériu Koordenadór Asuntu  Ekonómiku (MKAE), Sekretaria Estadu Formasaun Profesionál no Empregu (SEFOPE) no Ministériu Administrasaun Estatál (MAE) atu asume papél no kompeténsia ba jestaun sítiu turístiku.

“Ami ko’alia ona atu hamosu diploma ministeriál konjuta atu idaidak hatene ninia papél, liuliu sítiu turístiku ne’ebé SEFOPE halo ona atu hamutuk reabilita, MAE mós envolve iha laran atu asegura sanitáriu no MTKI atu haree liu ba jestaun iha fatin turístika sira,” tenik Ministru José Lucas ba Agência Tatoli, iha segunda ne’e, iha edifísiu MTKI Faról-Dili.

Tuir governante ne’e, diploma konjunta ne’e atu kontinua asegura sítiu turístiku komunitáriu ne’ebé halo ona hanesan Com iha munisípiu Lautém, Mota Bandeira iha munisípiu Ermera, Bee-manas Marobo iha munisípiu Bobonaro, Rekiraka iha munisípiu Viqueque, Seloi Kraik iha munisípiu Aileu, One Dolar Beach iha Hera-Dili, ne’ebé balun abandonadu.

“Iha diploma ministeriál ne’e, ita buka idaidak define ninia papél tanba atu dezenvolve sítiu turístiku sira iha Timor-Leste hanesan programa integradu ne’ebé presiza ami serbisu hamutuk,” nia akresenta.

MTKI planu atu halo reabilitasaun ba fatin turístiku sira hanesan Cristo Rei, Bee-manas Marobo no seluk tan, inklui halo ona konseitu turizmu komunitáriu atu suporta inisiativa lokál.

Antes ne’e, Sekretáriu Estadu Formasaun Profisionál no Empregu, Alarico de Rosário, dehan atu reabilita  kondisaun infraestutura Bee-manas Marobo iha Suku llat-Laun, postu administrativu Bobonaro, munisípiu Bobonaro, ne’ebé hahú a’at ona no presiza koordena ho liña ministeriál sira hanesan MTKI no seluk tan.

SEFOPE sei koordena ho MTKI atu haree ba Lei Orgánika Governu atu halo jestaun ba sítiu turístiku.

Governante ne’e nota, la’ós de’it bee-manas Marobo de’it maka presiza reabilita maibé presiza reabilita mós sítiu sira seluk.

SEFOPE mós sei koordena ho Sekretaria Estadu Komunikasaun Sosiál (SEKOMS) no MTKI atu promove sítiu turístiku sira hodi atrai turista sira.

Bee-manas Marobo reabilita hosi SEFOPE iha 2015 ho totál kustu $498.860 no inaugura iha loron 08 dezembru 2016 hosi Ministru Planeamentu no Investimentu Estratéjiku, Kay Rala Xanana Gusmão inklui Sekretáriu Estadu Polítika Formasaun Profisionál Empregu, IIídio Ximenes da Costa, iha VI Governu Konstitusionál nia tempu.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here