Ministru Prezidénsia Konsellu Ministru, Fidelis Manuel Leite Magalhães. Imajen Tatoli/Egas Cristovão

DILI, 07 setembru 2020 (TATOLI)Ministru Prezidénsia Konsellu Ministru, Fidelis Manuel Leite Magalhães, apela ba sidadaun ne’ebé simu subsídiu uma-kain ho montante $200 lahó forma loloos, atu entrega filafali ba Ministériu Solidaridade Sosiál no Inkluzaun (MSSI).

“Hakarak apela ba públiku, liuliu ba hirak ne’ebé la tuir forma loloos hodi benefisia apoia monetáriu (subsídiu uma-kain $200) ne’ebé Governu fó iha fulan hirak liubá, sei iha tempu bele devolve filafali ba MSSI,” tenik Ministru Fidelis liuhosi konferénsia imprensa iha Palásiu Governu, segunda ne’e.

Ho nune’e, governante ne’e lori Governu nia naran husu ba individu ne’ebé sente katak la merese maibé simu apoiu, simu duplikasaun no bainhira rendimentu aas liu $500 maibé simu, atubele fó filafali.

“Sidadaun ne’ebé la kumpre pedidu hosi Governu, ba oin sei iha medida koesiva ba individu ne’ebé halo abuzu,” nia akresenta.

Notísia Relevante: Governu sei prosesa ema ne’ebé falsifika dokumentu simu subsídiu uma-kain

Ezekutivu ne’e konsidera, importante partilla mensajen atu fó sai ba públiku tanba objetivu hosi apoia subsídiu ba uma-kain tanba iha situasaun surtu COVID-19.

“Ita fó solidaridade ba malu, maibé balun abuza apoia ka inisitiva sira no aproveita oportunidade ne’ebé la merese simu,” nia lamenta.

Antes ne’e, prosesu avaliasaun ba reklamasaun subsídiu, MSSI envolve parte relevante sira hanesan Comissão Antí Corrupção (CAC) no Provedoria Direitu Umanu no Justisa (PDHJ, sigla portugés), Inspetor Geral Estadu (IGE) no Comissão Função Pública (CFP).

Hosi rezultadu monitorizasaun no akompañamentu ekipa konjuta iha ámbitu ezekusaun subsídiu uma-kain iha territóriu nasionál, deskobre katak benefisáriu na’in 148 ne’ebé korresponde ho totál pagamentu $29.600, la prienxe rekizitu no iha obrigasaun tuir lei tenke entrega filafali osan ba Estadu.

Hosi serbisu monitorizasaun no akompañamentu ne’e, ekipa konjuta konsege trava benefisiáriu ne’ebé asesu ba subsídiu uma-kain hamutuk 1.927, korresponde ho totál osan Estadu estimativa $385.400.

Jornalista: Florêncio Miranda ximenes

Editora: Julia Chatarina

1 KOMENTÁRIU

HAKEREK NO HATÁN

Please enter your comment!
Please enter your name here