DILI, 07 setembru 2020 (TATOLI)-Labarik ho tinan lima mai kra’ik hamutuk ema na’in sia maka mate iha Opsitál Nasionál Guido Valadares (HNGV-sigla portugés) tanba sofre moras diarea durante fulan-janeiru to’o agostu 2020, divulga relatóriu HNGV.
Xefe Departementu Interina Pediatria, Lurdes Leão, relata durante fulan ualu nia laran pasiente diarea hamutuk 294 maka halo tratamentu saúde iha sala pediatria, husi sira ne’e kuaze labarik hotu ne’ebé transfere husi Munisípiu no Nasionál rasik.
Notísia Relevante : Ispa-diaréa rejista maka’as iha Hatulia
”Mate na’in sia ne’e ha’u klasifika ba rua kazu diarea ho má nutrisaun, no diarea la ho má nutrisaun hanesan ho komplikasaun sira seluk,” dehan nia ba jornalista sira iha HNGV, segunda ne’e.
Pasiente na’in sia ne’ebé maka mate, na’in lima baixa ho kondisaun má nutrisaun grave no na’in haat seluk diarea ho komplikasaun seluk.
“Pasiente barak mak tama iha má nutrisaun grave entaun ne’e risku ba mate se lae komplikasaun ne’e sai a’as liu kompara ho pasiente sira ne’ebé mak ho nutrisaun di’ak,” katak nia.
Tuir nia atu halo prevensaun ba moras diarea maka inan-sira tenki fase liman, tesi liman kukun halo moos bainhira atu prepara hahán ba oan sira, no sujere bainhira oan sira hetan moras refere tenki lori lalais ba Postu Saúde, Sentru Saúde no Ospitál hodi hetan tratamentu sedu profisionál saúde sira.
Notísia Relevante : ISPA, Diarea ho Moras Kulit Rejista Ás iha Ospitál Viqueque
Jornalista : Felicidade Ximenes
Editór : Agapito dos Santos
