Diretór Jerál AA/Alfándega, José António Fátima Abílio. Imajen Tatoli/Jogerjo Guterres

DILI, 07 setembru 2020 (TATOLI)-Autoridade Aduaneira (AA)/Alfándega halo apreensaun ba tua manas kontentór lima iha Portu Dili tanba tama ilegál mai Timór iha fulan-rua liubá.

“Ami halo apreensaun bebida tua manas no daudaun ne’e iha hela prosesu hamutuk kontentór lima maihosi Singapura,” informa Diretór Jerál Alfándega, José António Fátima Abílio ba Agência Tatoli iha nia knaar fatin, Palásiu Governu, segunda ne’e.

Dirijente ne’e hateten bebida tipu tua manas ne’e lori hosi Singapura no bainhira to’o iha Portu Dili, na’in ba sasán ne’e deklara katak la’ós nia maka hatama sasán ne’e mai Timór.

Tanba ekipa Alfándega konsidera hanesan sasán ilegál maka halo ona apreensaun no daudaun ne’e sei iha Portu Dili hodi submete ba investigasaun.

Diretór Jerál ne’e esplika, razaun Alfándega halo apreensaun tanba la tuir regra, ne’ebé bainhira hatama sasán tenke deklara maibé realidade la deklara.

“Hosi análiza ne’ebé ami halo haree katak iha kontentór ne’e sasán mai nia na’in tenke mai prosesa maibé na’in ba sasán ne’e deklara katak la’ós nia mak deklara, entaun sasán ne’e mai hosi ne’ebé automátikamente ami halo apreesaun tanba ilegál no buat ruma la loos ona,” nia haktuir.

Kona-ba na’in ba sasán no bebida ninia marka, Diretór ne’e seidauk bele fó sai tanba agora daudaun iha prosesu investigasaun.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here