Akizisaun foos faze dahuluk tonelada 6.000 atraka iha Portu Dili Ho ró MV. MY HUNG, iha kuarta (12/08). Imajen/MKAE

DILI, 07 setembru 2020 (TATOLI)-Prezidente Sentru  Lojíztika Nasionál (CLN, sigla portugés) Agusto Junior Trinadade, informa akizisaun foos hosi Vietname ba fase daruak hamutuk tonelada 12.500 to’o ona iha Portu Dili.

“Foos fase daruak hosi Vietname pur volta tonelada 12.500 to’o iha Portu Dili iha 26 de agostu,” informa Prezidente CLN, ba Agência Tatoli, foin lalais ne’e, iha ninia knaar fatin, Mandarin.

Ho nune’e, planu Governu halo akizisaun foos hosi nasaun Repúblika Sosialita Vietname hamutuk tonelada 30.000 to’o ona iha Dili hamutuk tonelada 18.500, ne’ebé falta tan tonelada 11.5000 atu kompleta.

Notísia Relevante: Razaun akizisaun foos Vietname: inserteza situasaun emerjénsia no demanda konsumu nasionál aas

Tuir Dirijente ne’e, hafoin foos ne’e to’o Dili la tula sai kedan tanba pesoál iha portu sei hatún materiál no sasán importadu seluk hosi ró sira ne’ebé atraka uluk iha Portu Dili, maibé daudaun ne’e foos hahú deskarga ona ba armajen CLN iha Bebora no Tibar.

“Kona-ba dokumentu sira laiha problema, hein de’it bainhira pesoál Portu Dili kandu foti hotu sasán ne’ebé mai uluk sira ne’e maka sei deskarga fali foos tonelada 12.500,” nia akresenta.

Autoridade Portuáriu Timor-Leste (APORTIL) adopta sasán ne’ebé tama uluk fó prioridade atu deskarga hafoin sasán tuir mai.

Bainhira foos faze dahuluk tonelada 6.000 atraka iha Portu Dili iha loron 12 agostu, iha loron tuir mai bainhira atu haree kondisaun foos, envolve mós membru Governu na’in-tolu hanesan sasin maka hanesan Ministru Turizmu, Komérsiu no Indústria José Lucas do Carmo da Silva, Ministru Koordenadór Asuntu Ekonómiku Joaquim Amaral, no Ministru Transporte no Komunikassaun José Agustinho da Silva.

Partisipa mós hosi reprezentante Banku Nasionál Komérsiu Timor-Leste (BNCTL, sigla portugés), Programa Ai-han Mundiál (WFP, sigla inglés), Autoridade Inspesaun Fiskalizasaun Atividade Ekonomia Sanitária (AIFAESA), Alfándega, imigrasaun, kuarentena, ekipa saúde no Polísia.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here