Diretór Jerál AA/Alfándega, José António Fátima Abílio. Imajen Tatoli/Jogerjo Guterres

DILI, 07 setembru 2020 (TATOLI)-Autoridade Aduaneira (AA)/Alfándega daudaun ne’e prepara ona planu prioridade ba tinan 2021 hodi halo reforma no implementa plataforma janela únika.

Diretór Jerál AA/Alfándega, José António Fátima Abílio, hateten prioridade iha tinan oin maka atu sosa ekipamentu no reforsa rekursu umanu.

“Planu prioridade 2021 maka haree ba prosesu reforma, automátikamente saida maka ami presiza ba implementasaun janela únika maka kompleta ekipamentu hanesan komputadór atu fasilita funsionáriu, tanba komputadór ne’ebé iha antigu ona no planu seluk atu asegura rekursu umanu,” dehan Diretór Jerál ne’e ba Agência Tatoli, iha ninia knaar fatin, Palásiu Governu, segunda ne’e.

Tuir nia, iha prioridade ba rekursu umanu tanba Alfándega seidauk halo serbisu ho másima tanba ne’e Alfándega daudaun halo rekrutamentu funsionáriu, liuliu graduadu sira hodi priense vaga ne’ebé identifika ona.

“Prosesu rekrutamentu sei halo uluk ba na’in-20 no tuir mai mak na’in-50. Rekrutamentu ne’e sei uza orsamentu 2021, ne’ebé espera katak Orsamentu Jerál Estadu (OJE) 2021 bele iha hodi responde,” nia informa.

Na’in-20 ne’ebé iha ona prosesu rekrutamentu sei priense vaga iha aprovizionamentu, administrasaun, no inspesaun fízika iha Alfándega.

“Rekrutamentu tuir mai sei kobre vaga iha diresaun parte legál, auditoria, no sira ne’ebé mak seidauk iha ema no funsionáriu Alfándega balun besik tama ba idade reforma, tanba ne’e tenke antesipa prepara fali ema troka,” nia dehan.

Aleinde ne’e, kria infaestrutura ne’ebé tuir planu sei estabelese dormetóriu ba funsionáriu Alfándega iha fronteira Batugade, postu administrativu Maliana, munisípiu Bobonaro.

“Ami planu atu halo dormetóriu iha tinan barak ona maibé la konsege tanba de’it sei uza orsamentu doudésimu. Dormetóriu ba funsionáriu tanba bainhira sira presta serbisu di’ak tenke kria kondisaun atu asegura sira,” nia akresenta.

Komputadór ne’ebé sei sosa uluk hamutuk 100 ba metade totál funsionáriu Alfándega 226.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here