Arsebispu ba Arkedioseze Metropolitana Dili, Don Virgílio do Carmo da Silva. Imajen Tatoli/Egas Cristovão

DILI, 06 setembru 2020 (TATOLI)–Arsebispu Metropolitana Dili, Don Virgílio do Carmo da Silva, SDB, hateten, ohin loron uma kreda Timor-Leste hakat komemora nia loron istóriku tanba ne’e husu ba sarani sira keta taka laran ba Nai Maromak maibé mai ho ksolok, hahí, tuku tuur ba Nai Maromak. 

Don Virgílio hatutan, tanba moris iha mundu nu’udár ema peregrinu no moris ne’e hanesan knananuk ida, tanba ne’e bainhira rona Nai nia lian karik nakloke nafatin ba Maromak nia futar liafuan.

“Mai ita ho ksolok hahí, tuku tuur ba Nai Maromak. Se ohin ó rona Nai lian karik keta taka ó-nia laran, tanba ema sei moris iha rai nu’udár peregrinu ida no ita-nia moris ne’e hanesan knananuk ida. Tanba ne’e, moris atu di’ak presiza Nai Maromak ne’ebé ita bele hasa’e ita-nia moris ba nia loro-loron ho fuan laran ne’ebé di’ak no mós nakloke nafatin ba Maromak nia futar liafuan,” dehan Don Virgílio do Carmo da Silva iha nia omília bainhira prezide misa ba aniversáriu Dioseze Dili ba dala-80 iha igreja Katedrál Vila verde, Dili, domingu ne’e.

Bainhira tuku tuur hahí ona ba Nai nia futar liafuan, Don Virgílio dehan, tenke tulun fali maluk sira ne’ebé la’o sala dalan. Tanba tuir Jesus hanorin katak maluk ne’ebé la’o sala dalan ona tenke korajen tulun nia no rekopera fila-fali ba dalan di’ak.

“São Paulo dehan, se ita la hadomi ita-nia maluk ne’e tusan ida-ne’ebé ita lori. Tanba ne’e, ita tenke sai sintinela ba ita-nia maluk. Tanba Jesus hanorin mai ita atu tulun malu rekopera ita-nia maluk  ne’ebé la’o sala karik, ita fó korajen ba nia rekopera fila-fali ba beleza natureza furak ita ema ninian ne’ebé tuir ilas Nai Maromak, tanba ita hotu lori ilás maromak nian,” nia dehan.

Amu bispu ne’e hatete,. atu lori maluk sira ne’ebé la’o sala dalan ba fali dalan di’ak ne’e defísil tebes maibé Maromak fó ona ninia domin fiar ba ida-idak iha responsabilidade atu ajuda maluk sira ne’ebé la’o sala dalan.

“Maske la fasil maibé ita koko tanba maromak fó ona ninia domin fiar ba ita atu hatán muda maluk ne’ebé la’o sala dalan. Tanba se bainhira ita la konsege hatán ajuda maluk ba dalan di’ak ne’e, hanesan São Paulo dehan tusan ida-ne’ebé ita lori no deve ba Maromak. Tanba ne’e, fó liman ba malu, tulun malu ba dalan di’ak,” nia dehan.

Partisipante sira ne’ebé partisipa iha selebrasaun eukaristia ba komemorsaun ba Igreja Dioseze Dili ne’ebé halo tinan ba dala-80 ne’e maka hanesan, Prezidente Repúblika Francisco Guterres ‘Lú Olo’ ho nia Espoza, Prezidente Parlamentu Nasionál Ainiceto Guterres ho nia Espoza, Prezidente Tribunál Rekursu Deolindo do Santos ho nia Espoza no mós sarani ema atus mak tuir misa refere.

Jornalista: osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here