Saudozu Tomás Correia de Oliveira Alias “Oli Lemorai”. Imajen/Espesiál.

DILI, 05 setembru 2020 (TATOLI)–Veteranu Tomas Correia de Oliveira “Oli Lemorai” nu’udar timoroan ida ne’ebé moris iha mundu ne’e, ninia moris tomak laiha espasu ida ne’ebé mak mamuk de’it maibé ninia moris ho espasu ida ne’ebé mak nakonu ho istória no hakarek istória boot ba Timor-Leste nia independénsia.

Padre Joel Lopes hateten, hanesan veteranu ida maski nia ema kiik ida maibé nia hakerek istória boot hanesan ema fiar na’in no sidadaun timoroan ne’ebé ho nia esforsu no nia mehi tomak luta ba povu no rai-lulik Timor-Leste ida-ne’e to’o hetan ukun rasik-aan.

Notísia Relevante: Naran “Oli Lemorai” hakerek iha Timor-Leste nia “Besi Riti”

“Ha’u hanoin ita-nia Veteranu “Oli Lemorai”  nia moris iha mundu laiha espasu ida ne’ebé maka mamuk de’it no nia la hakerek istória ne’ebé kiik. Maski nia ema kiik ida maibé nia hakerek istória boot hanesan ema fiar na’in no hanesan sidadaun timoroan ida ne’ebé hahú hosi nia moris to’o nia mate, nia iha fiar nafatin nu’udar kristaun no ema Katóliku. Maibé, nia fiar hosi nia esforsu no nia mehi tomak ba rai ida-ne’e ne’ebé uluk dehan “Mate ka Moris Ukun Rasik Aan’,” dehan Padre Joel Lopes iha nia omília bainhira prezide misa requiem ba Saudozu “Oli Lemorai” nia isin-mate antes lori ba iha nia knua moris fatin Vaniria (Lautém) iha Igreja Ai-Mutin, Dili, sesta ne’e.

Padre Joel Lopes preside misa requiem ba Vetarnu “Oli Lemorai” nia mate-isin iha igreja Ai-Mutin, Dili. Imajen TATOLI/Osória Marques.

Amu Joel hatutan, veteranu “Oli Lemorai” hakerek nia istória ne’e hanesan iha livru moris ida-nian no Estadu rekoñese nia ezisténsia no nia favór tomak ne’ebé nia halo hanesan forsa no mós hanesan Antigu Kombatente ba Libertasaun Nasionál, nune’e nasaun hakerek nia naran iha livru nasaun nian tanba kontribuissaun ida ne’ebé boot.

Nia hateten, veteranu “Oli Lemorai” hakerek nia naran ne’e iha besi riti ida hanesan São João haktuir, ‘Ha’u hakarak hakerek ha’u-nia naran iha besi riti kro’at ida atu ema hotu ne’ebé liu hateke ba besi riti ne’e sona nia fuan’ ne’ebé ho sentidu pozitivu katak provoka ema atu aprende saida maka nia halo ona iha nia moris tomak.

“Ha’u hanoin, veteranu ‘Oli Lemorai’ mós provoka ita liuhosi nia istória moris nian la’os nostalgia de’it. Tempu pasadu, ba nia liu hotu ona, nia la’o ona to’o rohan ona. Maibé, oinsá mak ninia esperiénsia, esforsu tomak kontra invazór Indonézia durante tinan 24 nia-laran, ne’e hanesan edukasaun ida ba ita liu-liu joven sira oinsá firme iha vizaun no misaun, no lori misaun ne’e tenke lori to’o rohan,” amu ne’e dehan.

Amu Joel hateten, ida-ne’e mak saudozu “Oli Lemorai” nia  hakarak atu hateten ba timoroan sira no hatudu katak sai sidadaun ne’e tenke sidadaun duni no hatudu nafatin sai fiar iha Katóliku ne’e to’o mate.

Hafoin loron ida no kalan ida hamutuk ho família iha nia knua moris fatin Vaniria-Eukisi-Lautem, tuir planu, veteranu “Oli Lemorai” nia isin-mate sei hatuur no haloot iha fatin hakmatek rohan laek nian iha Jardim das Herois Metinaro iha loron aban (domingu, 06 setembru 2020) iha, tuku 15.00 oras Timor-Leste.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here