DILI,04 setembru 2020 (TATOLI)-Pasiente Timoroan ho COVID-19 pozitivu iha fulan-agostu liubá daudaun ne’e rekupera no sai ona husi sala izolamentu Sentru Saúde Vera-Cruz Dili.
Iha loron 20 fulan-agostu 2020 liubá, Ministériu Saúde deteta Estudante Timoroan ne’e ho kazu COVID-19 pozitivu.
Pasiente ne’e ho ninia viájen maihosi Denpasar Bali Indonézia iha loron 05 fulan-agostu hamutuk ho traballadór Timoroan iha Korea Súl, Estadu Unidu Amérika no Portugal ho Aviaun Citilink ne’ebé Governu liuhosi SEFOPE aluga mai Timor-Leste.
Diretora Jerál Prestasaun Saúde, Odete da Silva Viegas, hateten totál pasiente COVID-19 iha Timor-Leste hamutuk 27, maibé oras ne’e na’in 26 rekupera ona no falta na’in ida mak sei kontinua halo tratamentu iha sala izolamentu.
”Hakarak atu informa ba publiku katak daudaun ne’e ita-nia pasiente rua poitivu ida tama iha loron 20 agostu 202 no ida tuimai tama iha loron 26 agostu entaun husi pasiente rua ne’e ida tama iha loron 20 agostu halo teste dala rua tutuir malu negativu no ohin ita fó sai nia ba uma no baixa iha vera kruz ba ohin loron nian iha ema ida de’it,” katak Odete, iha konferénsia imprensa ohin, iha Caicoli Dili.
Eis Diretora ezekutivu HNGV ne’e apela ba ema hotu-hotu atu kordena no fó nafatin kooperasaun ba Ministériu Saúde hodi halo prevensaun ba transmisaun coronavirus iha TL.
Totál konfinamentu obrigatóriu hamutuk 205, auto-kuarantena iha ema na’in 152, pasa ona loron 14 hamutuk 3.853 numeru totál ne’ebé mak teste laboratóriu 5.860 no hein rezultadu hamutuk 100 kumulativu resultadu negativu hamutuk 5.733 no rekuperadu 26.
Jornalista : Felicidade Ximenes
Editór : Agapito dos Santos
