Sekretáriu Estadu Komunikasaun Sosiál, Merício Juvinal dos Reis ‘Akara’. Imajen Tatoli/Egas Cristovão

DILI, 04 setembru 2020 (TATOLI)-Sekretáriu Estadu Komunikasaun Sosiál (SEKOMS), Merício Juvinal dos Reis ‘Akara’, enkoraja mídia sira atu promove peace journalism ka jornalismu ba pás, tanba durante ne’e nia akompaña mídia hahú kontribui ba pás no estabilidade ba rai-laran, maibé seidauk másimu.

Nia nota katak sei iha mídia balun maka bainhira halo entrevista fontes ho tendénsia provokativu no halo notísia bombástiku no dramatiza hodi provoka ema-nia emosaun no situasaun.

“Ita tenke promove peace jornalism iha kontekstu ne’ebé mídia nafatin livre, nafatin iha independénsia no servisu tuir kódigu étika jornalizmu maibé tenki iha objetivu finál atu hola parte hanesan sidadaun ne’ebé iha responsabilidade atu kontribui ba pás no estabilidade iha rai-laran tanba bainhira laiha pás, ita hotu sei hasoru problema no sai vítima inklui mídia sira,” dehan Sekretáriu Estadu Akara, ne’ebé haktuir iha nota imprensa ne’ebé Agência Tatoli asesu, sesta ne’e.

Tuir governante ne’e, kontextu atuál Timor-Leste daudaun ne’e, liga ho diverjénsia dinámika polítika, impase polítika, dezastre naturál no ezisténsia COVID-19, papél mídia importante tebes atu relata faktu ho loloos hodi kontribui ba situasaun hakmatek, hametin unidade nasionál no la provoka situasaun.

Peace journalism importante atu promove sentimentu solidariedade, unidade entre sidadaun, liuliu líder partidu polítiku sira hodi tau aas prioridade ba interese Estadu no nasaun,” nia akresenta.

Tanba ne’e, membru ezekutivu ne’e husu ba mídia sira tenki manifesta peace jornalism iha planu kobertura ne’ebé tenki ho baze cover both side ka balansu hosi parte rua, mantein kódigu étika jornalizmu, espíritu pozitivu, profisionálizmu, labele iha tendénsia “agenda setting” no labele halo propaganda hodi provoka no dezestabiliza situasaun, tanba sidadaun iha direitu atu hetan informasaun loloos no kredível.

Peace journalism eziji jornalista kobertura ho evidénsia forte

Aleinde ne’e, peace jornalism ezije jornalista sira atu halo kobertura ho rigór no labele halo títulu notísia iha tendénsia provokativu.

“Bainhira halo kobertura tenki iha evidénsia forte, tenki investigativu atu nune’e bainhira hatún iha evidénsia forte no kle’an. Labele halo notísia la kle’an, la investigativu no utiliza mídia atu provoka. Peace journalism tenke refleta prinsípiu kobertura no notísia ne’ebé lansa tenke ho kualidade aas, promove unidade nasionál,  dame, kontribui ba estabilidade sosiál no polítika iha ita-nia nasaun,” Sekretáriu Estadu Akara subliña.

Governante ne’e reforsa liután, Governu iha knaar atu enkoraja no orienta nasaun atu hakmatek, armonia, unidade entre sidadaun no iha estabilidade governativa, atu nune’e dezenvolvimentu bele la’o hodi responde ba nesesidade bázika povu.

“Governu sei nafatin kontinua apoia mídia sira, liuliu jornalista no konsellu redasaun liuhosi fó formasaun atu sira bele hatene knaar jornalizmu ba pás,” nia promete.

Governu liuhosi SEKOMS mós sei fó apoiu ba Konsellu Imprensa atu tau-matan ba mídia, liuliu jornalista sira atu hakerek notísia tuir kódigu étika jornalizmu no halo kooperasaun ho Asosiasaun Jornalista sira atu fó formasaun avansadu, liuliu maneira hakerek notísia ho karatér investigativu no uza termu loloos.

“Durante ne’e, SEKOMS kolabora ho Governu Portugés liuhosi Instituto Camões ne’ebé maka fó formasaun lian portugés ba jornalista sira atu fasilita hakerek notísia ho lian portugés ho di’ak no iha planu atu fó formasaun lian tetum padronizadu ba jornalista sira iha futuru,” nia fó hanoin.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here