Koordenadór Jerál Sekretariadu Konsellu Jestaun Fundu COVID-19 no atuál Diretór Jerál Orsamentu Estadu Ministériu Finansa, Januário da Gama. Imajen Tatoli/Egas Cristovão

DILI, 04 setembru 2020 (TATOLI)-Diretór Jerál Planeamentu no Orsamentu Ministériu Finansa (MF), Januário da Gama, informa progresu ba preparasaun Orsamentu Jerál Estadu (OJE) 2020 tama ona ba faze tradusaun no verfikasaun kualidade (quality check) ba livru orsamentu sira.

“Ita prepara hela proposta orsamentu 2020, ne’ebé iha semana oin ami komesa imprime no iha 15 setembru bele submete ona ba Parlamentu Nasionál,” tenik Diretór Jerál ne’e iha edifísiu MF, Aitarak-laran, sesta ne’e.

Iha loron 26 agostu, liuhosi reuniaun Konsellu Ministru aprova tetu OJE 2020 ho valór biliaun $1,497.

Konsellu Ministru aprova projetu proposta lei OJE 2020 atu kobre nesesidade programa no prioridade nasionál ne’ebé VIII Governu Konsitutsionál define ona, liuliu iha nível estabilizasaun setór sosiál, ekonómiku, prosesu reforma institusionál no sei inklui despeza ba resposta COVID-19 no medida rekuperasaun ekonómika.

Proposta tetu OJE 2020 ho montante biliaun $1,497, fahe ba kategoria saláriu no vensimentu millaun $206,8, bens no servisu millaun $496,7, tranferénsia públika millaun $571,1, kapitál menór millaun $8,9, kapitál dezenvolvimentu millaun $213,4.

OJE 2020 ne’e finansiadu hosi reseita doméstika millaun $172,3, hosi Rendimentu Sustentável Estimadu (RSE) millaun $544,3, ne’ebé totál sai millaun $316,6, maibé tanba osan la to’o (défise) entaun foti exesu hosi fundu mina-rai millaun $477 liu RSE, ho totál levantamentu hosi fundu mina-rai hamutuk biliaun $1,011.3.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here