Koordenadór Jerál Sekretariadu Konsellu Jestaun Fundu COVID-19 no atuál Diretór Jerál Orsamentu Estadu Ministériu Finansa, Januário da Gama. Imajen Tatoli/Egas Cristovão

DILI, 04 setembru 2020 (TATOLI)-Ministériu Finansa (MF) loke sesaun traballu hodi distribui tetu orsamentál ba kada ministériu no instituisaun Estadu sira, hafoin Konsellu Ministru aprova tetu agregadu no dezagregadu Orsamentu Jerál Estadu (OJE) 2021 ho valór biliaun $1,6.

“Ministrériu Finansa konvoka sesaun traballu ida hodi bolu ministériu sira hotu atu disemina regra no prosedimentu kona-ba elaborasaun Orsamentu Jerál Estadu 2021 nian no distribui mós tetu orsamentu ba instituisaun idaidak nian,” tenik Diretór Jerál Planeamentu no Orsamentu MF, Januário da Gama, iha salaun MF Aitarak-laran, sesta ne’e.

Totál orsamentu biliaun $1,6 hanesan tetu ne’ebé  hafoin Governu liuhosi MF no Unidade Planeamentu Monitorizasaun no Avaliasaun (UPMA) halo verifiasaun no mapamentu ba medida rekuperasaun ekonómika hosi Komisaun ba Elaborasaun Planu Rekuperasaun Ekonómika.

Tuir Diretór Jerál ne’e, montante tetu orsamentu 2021 halo kobertura ba despeza adisionál sira iha atividade medida rekuperasaun ekonómika ne’ebé ministériu sira kontribui no konsentra atubele atinje objetivu no alvu VIII Governu Konstitusionál iha tinan oin.

Notísia Relevante: Governu define tetu OJE 2021 biliaun $1,6

Konsellu Minsitru mós aprova no halo apresiasaun ba perioridade nasionál lima ne’ebé aliña ho programa ne’ebé sei guia prosesu elaborasaun OJE 2021 hanesan setór kapitál sosiál, dezenvolvimentu ekonómiku ne’ebé aliña mós atividade rekuperasaun ekonómika, infraestutura bazika no konetividade, dezenvolvimentu ambientál no reforma instutusionál.

Hosi totál biliaun $1,6 aloka ba kategoria saláriu no vesimentu millaun $216,2, sasán no servisu millaun $451,1,  tranférensia públika millaun $480,7, kapitál dezenvolvimentu millaun $235,8 inklui kapitál menór millaun $6.

“Iha kapitál menór ne’e halo kontinua ba akizasaun ekipamentu no sasán seluk ne’ebé ita projeta katak iha tinan ne’e nia rohan (2020), la konsege entaun ita lori nia orsamentu ne’e ba tinan oin mai (2021) ho montante millaun $6,” Diretór ne’e adianta.

Dirijente ne’e dehan, montante tetu OJE 2021 inklui mós despeza ba Rejiaun Administrativa Espesiál Oé-cusse Ambeno (RAEOA) no Zona Espesiál Ekonomia Sosiál Merkadu Timor-Leste, (ZEESM,TL) hamutuk millaun $127, ne’ebé hamutuk ho proposta OJE 2020 xumba iha Parlamentu Nasionál.

Nia esplika, millaun $127 iha tetu OJE 2021 ne’e sei re-konsidera fali atu RAEOA-ZEEMS,TL bele kontinua implementa programa no projetu kontinuasaun inklui mós projetu foun sira ne’ebé nesesita atu implementa tuir planu estratéjiku rejiaun ne’e.

“Iha tinan ne’e ita prepara orsamentu rua hanesan proposta orsamentu 2020 no 2021,” nia akresenta.

18 setembru, ministériu no instituisaun submete proposta orsamentál ba MF

Kada Ministériu sira sei prepara orsamentu no halo submisaun mai iha MF iha loron 18  setembru, hafoin Komite Revisaun Orsamentu Polítika (KROP) sei akontese iha loron 28 to’o 30 setembru hodi halo konkluzaun no aprovasaun.

“Ami lori ba Konsellu Ministru ho proposta lei no dokumentu sira, atu iha loron 07 outubru halo finalizasaun ba livru orsamentu no proposta lei no iha 15 outubru bele aprezenta ba iha Parlamentu Nasionál,” Januário informa.

MF sei konsetra de’it ba ministériu no instituisaun sira ne’ebé ninia atividade kontribui ba medida rekuperasaun ekonómiku no seluk halo verfikasaun no validasaun ba proposta atu aprezenta iha konsisténsia entre kustu ho programa ne’ebé iha postura investimentu kapitál barak liu no oituan aloka ba iha despeza mákina Estadu.

MF no UPMA sei kontinua halo akompañamentu no fó asisténsia tékniku durante semana rua, ba liña ministériu sira atu bele prepara orsamentu ho di’ak tuir prioridade VIII Governu.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here