Ministru Administrasaun Estatál, Miguel de Carvalho. Imajen Tatoli/Egas Cristovão

DILI, 04 setembru 2020 (TATOLI)-Ministru Administrasaun Estatál (MAE), Miguel Pereira de Carvalho, informa lista ekipa liña frente sira hosi munsípiu 12 inklui Rejiaun Administrativa Espesiál Oé-cusse Ambeno (RAEOA) hanaran task force hamutuk 300-resin sei simu suplementu remuneratóriu.

“Liña frente iha munisípiu ne’e ita bolu ekipa task force, ne’ebé kada munisípiu reprezenta na’in-21 to’o 30 hosi munisípiu hotu hamutuk 300-resin. Preziente Autoridade Munisipál no Administradór Munisípiu sira fó ona lista mai ha’u atu haree no prosesa ba pagamentu tuir dekretu-lei 17/2020 ne’ebé prezidente Repúblika promulga ona,” dehan Ministru Administrasaun Estatál, Miguel Pereira de Carvalho, iha Parlamentu Nasionál, sesta ne’e.

Tuir governante ne’e, atu halo pagamentu sei hein Governu halo rezolusaun ida atu atribui montante sira ba kada pesoál ekipa task force iha munisípiu.

Antes ne’e, Prezidente Repúblika, Francisco Guterres Lú Olo, promulga alterasaun dahuluk ba Dekretu-Lei númeru 17/2020, 30 abríl, ne’ebé kria suplementu remuneratóriu ba funsionáriu, ajente no traballadór iha administrasaun públika iha ámbitu prevensaun no kontrolu COVID-19 durante implementasaun Estadu Emerjénsia.

Alterasaun ba Dekretu-Lei sei aplika ba implementasaun Estadu Emerjénsia tutuir malu ne’ebé deklara no renovadu liuhosi Dekretu Prezidente Repúblika númeru 29/2020, 27 marsu, 32/2020, 27 abríl númeru 35/2020, 27 maiu.

Iha alterasaun dahuluk, Dekretu-Lei ne’e fó kategoria traballadór sira iha Serviço Nacional de Inteligência ne’ebé envolve iha operasaun oioin ba prevensaun no kontrolu COVID-19 no traballadór liña frente ne’ebé serbisu iha task force, iha munisípiu no RAEOA hodi implementa medida prevensaun no kontrolu COVID-19 iha nível lokál.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here