Pároku Igreja Imaculada da Conceição Katedrál Dili, José António. Imajen TATOLI/Osória Marques.

DILI, 04 setembru 2020 (TATOLI)–Pároku Igreja Imaculada da Conceição Katedrál Dili, José António, husu ba ukun na’in sira katak bainhira ukun povu atu halo relasaun ne’ebé di’ak ba nia povu  tenke konsidera-an uluk hanesan ministru Kristu nian.

Amo José hatutan, ukun na’in presiza halo relasaun ne’ebé di’ak ho-nia povu tanba tuir leitura ne’ebé Saun Paulo hakerek ba korintu sira katak nuudár servidór tenke iha relasaun ne’ebé di’ak entre ema ho ema no ba Kristu.

“Joao Paulo husu ita atu ida-idak konsidera ita-nia an hanesan ministru Kristu nian. Ita servidór iha kristu atu ita-nia relasaun ho ita-nia maluk sira hanesan ita-nia rerasaun ho kristu ba Maromak,” dehan Amo José António liuhosi nia omília bainhira prezide misa fó bensaun ba meza prezidénsia Parlamentu Nasionál nian, iha Igreja Katedrál Dili, Sesta ne’e.

Amo josé hatutan, nu’udar ema kriatura halo relasaun di’ak ho Maromak tenke liuhosi Jesus Kristu tanba Jesus Kristu nu’udár fundamentu relasaun ema hotu-hotu nian.

“Ita-nia relasaun ho nai Maromak liuhosi Jesus Kristu. Tanba Jesus Kristu mak nu’udár fundamentu ita-nia relasaun hotu-hotu, nia mai atu halo renovasaun relasaun ita ema ho Nai Maromak, tanba ne’e ukun na’in sira mós tenke hatudu imi-nia relasaun domin ba povu,” nia dehan. 

Tanba, nia dehan, Jesus mai iha mundu atu hafoun relasaun ema ho ema tanba molok nia mai iha mundu, haree ba nia povu sira terus barak ona tanba kalan loron halo funu hela de’it. Tanba ne’e, nia mai atu halakon ema-nia mentalidade ne’ebé hakarak halakon malu ne’e.

“Jesus mai halakon sira-nia neon, sira-nia hakarak, sira-nia mentalidade ne’ebé halakon malu ne’e, atu hamutuk iha fiar ida de’it ba Jesus Kristu,” Amo José hateten.

Tanba, amo Jose esplika, apostulu sira-nia relasaun ho kristu hatudu atu hanoin buat ne’ebé Saun Paulo hanorin katak bainhira konsidera nia-aan boot liu halo nia haluha Jesus Kristu, nia laiha ona kapasidae pesoál atu halo juiz kona-ba ema sira.

“Tanba ita-nia juiz maka kristu no kristu maka hamriik bele treinu julga ita. Tanba ne’e, mai ita hamutuk hodi serví liberdade nasaun no povu tomak nian,” nia dehan.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here