Ministru Defeza, Filomeno da Paixão de Jesus. Imajen Tatoli/Egas Cristovão

DILI, 04 setembru 2020 (TATOLI)-Governu liuhosi Ministériu Defeza (MD) iha ona planu atu aloka orsamentu balun iha Orsamentu Jerál Estadu (OJE) 2021 atu konstrui portu rua iha Hera, munisípiu Dili, atu fasilita FALINTIL-Forsa Defeza Timor-Leste (F-FDTL) hosi Unidade Komponente Navál.

“Iha Portu navál Hera iha rua, ida Governu Austrália mak hakarak ajuda hodi ró rua ne’ebé sei fó Timor-Leste mai atraka no konstrusaun ne’e sei hahú iha tinan oin to’o 2023 no portu ida fali Governu Timor-Leste mak propoin iha orsamentu 2021 atu halo infraestutura ba portu foun, nune’e ró rua ne’ebé ita atu hola bele atraka iha ne’ebá,” informa Ministru Defeza, Filomeno da Paixão de Jesus, iha Parlamentu Nasionál (PN), kinta ne’e.

Tuir Ministru Filomeno, presiza orsamentu millaun $20-resin atu hadi’a portu rua maibé Governu nasaun rua sei aloka orsamentu pur faze to’o ramata no konstrusaun sei komesa iha tinan 2021 ba oin.

“Ita mós planu atu hola ró rua no Austrália mós hakarak apoia tan ró rua mai ita,” nia akresenta.

Kona-ba espesífiku ró, MD propoin de’it maibé Konsellu Ministru mak sei deside ró ne’e atu hola iha nasaun ne’ebé, maibé ho espesifikasaun ró rua ne’e sei boot liu ida Austrália atu oferese.

“Austrália atu fó ró rua ho medida metru 40, maibé ita atu hola ró rua ho metru 75 ne’ebé hanesan espesifikasaun hosi Komponente Navál mai Ministériu Defeza,” nia informa.

Governante ne’e dehan, ró rua ne’ebé Governu Timor-Leste sei hola sei bele halo operasaun iha tasi mane, ne’ebé ida foku ba patrullamentu no ida ba lojíztika.

“Ita hanoin aban bainrua produsaun mina iha tasi laran funsiona ho di’ak, ita sei haree polusaun, inséndiu no baunhira ema ilegál tama ita sei kaptura no sei prevene hotu ona situasaun ne’e,” nia hatutan.

Ministru informa, planu no programa sira sei tama hotu ba Autoridade Marítima no sei akumula hotu Unidade Komponente Navál hosi F-FDTL inklui Unidade Polísia Marítima, no Polísia Nasionál Timor-Leste (PNTL) atu hamutuk asegura riku-soin iha tasi laran.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here