Primeiru-Ministru, Taur Matan Ruak hamutuk ho Membru Governu Sira partisipa iha Debate kona-ba pedido Autorizasaun ba Renovasaun Deklarasaun Estadu Emerjênsia husi Prezidente Repúblika, iha Sala Plenáriu PN, kinta (03/09). Imajen Tatoli/Egas Cristovão

DILI, 03 setembru 2020 (TATOLI)-Primeiru-Ministru (PM), Taur Matan Ruak, agradese deputadu sira iha Parlamentu Nasionál (PN) ne’ebé autoriza ona pedidu Prezidente Repúblika Francisco Guterres ‘Lú Olo’ hodi dekreta Estadu Emerjénsia (EE) ba faze dalimak.

Votu autorizasaun PN ne’e liuhosi votasaun nominál ho rezultadu a-favór 40, abstesaun hitu no kontra 0.

“Ha’u agradese ba apoiu tomak hosi deputadu sira no espera katak estensaun Estadu Emerjénsia ne’e Governu hamutuk ho sidadaun sira kontinua buka no esforsa deteta kazu no kura lalais atu salva sidadaun hotu nia vida hosi COVID-19,” tenik PM Taur, iha plenária PN, kuarta ne’e.

Notísia Relevante: PN autoriza Prezidente-Repúblika dekreta EE dalima

Xefe Governu dehan, implementasaun EE ba faze dalimak ne’e sei kontinua mantein seguransa no aumenta postu balun iha fronteira terrestre hanesan iha área Maliana no Rejiaun Administrasaun Espesiál Oé-cusse no Ambeno (RAEOA) atubele prevene kontájiu surtu COVID-19.

“Iha área fronteira ita sei aumenta postu sira hanesan iha área Tunubibi, Maliana no Oé-cusse, atubele asegura movimentasaun sidadaun no estranjeiru tama iha Timor-Leste,” nia akresenta.

Objetivu estensaun EE, atu kontinua deteta kazu importadu no bele kura ho di’ak, impede kontájiu ba komunidade sira nia leet no salva vida populasaun, maski iha períodu ne’e sei limite direitu no liberdade sidadaun sira asesu no halo movimentasaun iha fronteira sira hodi ezerse maiór kontrolu no reforsa medida sanitária atu prevene kontájiu surtu ne’e.

EE dahaat hahú iha oras 00:00 loron 06 agostu no termina iha oras 23:59 loron 04 setembru 2020.

Pedidu Prezidente Repúblika ba renovasaun ho ninia durasaun loron-30, hahú hosi oras 00:00 loron 06 setembru 2020 (sábadu) no sei termina iha oras 23:59 loron 04 outubru 2020 (domingu) iha territóriu nasionál tomak hodi suspende direitu balun ho parsialmente.

Direitu ne’ebé sei suspende maka sirkulasaun internasionál, liberdade sirkulasaun no fixasaun rezidénsia ba kualkér pontu iha territóriu nasionál no direitu rezisténsia.

Razaun Xefe Estadu husu revonasaun deklarasaun EE tanba Timor-Leste geografikamente besik Repúblika Indonézia ne’ebé rejista ona 160.000 resin kazu kofirmadu COVID-19, ema na’in-7.000 mak mate hosi provínsia 34 iha territóriu Indonézia nian inklui provínsia viziña Timór Osidentál (NTT-Nusa Tenggara Timur).

Nune’e mós, nasaun viziña Austrália ne’ebé rejista ona 25.000 resin kazu infesaun konfirmadu no ema na’in-600 resin mak mate.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here