Polísia feminina Munisípiu Dili, liu na’in-25 tuir treinamentu fíziku no mentalidade hodi atua kuakér sitasaun krime no anarkizmu sira iha Dili-laran. Imajen/Eugénio Pereira

DILI, 03 setembru 2020 (TATOLI) – Komandu Polísia  Munisípiu Dili liuhusi ekipa polísia feminina, ohin, fó treinamentu fíziku no mentalidade ba feminina polísia atu atua situasaun anarkizmu iha rai-laran.

Treinamentu fíziku uza tamen no ekipamentu treinamentu sira seluk ne’e fó direita husi Instrutór PNTL Dili envolve feminina PNTL na’in 25-liu.

Komandante PNTL Munisípiu Dili, Superintendente Xefe, Henrique da Costa, afirma, treinamentu ne’e bele prepara feminina PNTL nian no aumenta sira-nia koñesimentu no mentalidade atu prepara aan bainhira Estadu presiza PNTL hodi atu situasaun ruma.

Polísia feminina Munisípiu Dili, liu na’in-25 tuir treinamentu fíziku no mentalidade hodi atua kuakér sitasaun krime no anarkizmu sira iha Dili-laran. Imajen/Eugénio Pereira

“Ita hakarak polísia feminina sira mós bele hetan treinu kona-ba uza forsa ninian liu-liu ba iha oinsá ajuda forsa rezerva ekipa taskforce hodi atua situasaun ruma relasiona ho manifestasaun ka asuntu seguransa nian,”  hateten Komandante  Henrique da Costa, ba jornalista iha Komandu PNTL, Caicoli, Dili.

Tuir planu ba oin, polísia feminina husi eskuadra Atauro, Dili, Metinaro, Vera Krús, Kristu Rei, Don Aleixo no Na’in Feto bele partisipa hotu nivel báziku too nivel avansadu.

Nia hatutan, agora polísia feminina sira foin hahú treinamentu báziku uza de’it tamen no stick no tama ba formasaun no treinamentu avansadu maka foin bele uza ekipamentu kompletu.

Iha fatin hanesan, reprezentante Komandante Polísia feminina, Inspetór Anita Quadros, dehan, treinamentu ne’e importante tebes hodi hasa’e polísia feminina sira nia mentalidade no fíziku hodi prepara aan atua situasaun ruma bainhira Estadu presiza.

“Treinamentu ida ne’e planu komandu nian atu dezenvolve feminina hotu- hotu hodi prepara sira nia fíziku no mentalidade,” Anita Quadros hateten.

Nia hatutan, feminina PNTL la’ós servisu de’it iha fatin investigasaun ka administrasaun no investigasaun kriminál nian, maibé feto presiza envolve aan mós iha treinamentu fíziku sira hanesan ne’e hodi reforsa sira-nia mentalidade no koñesimentu atua situasaun konflitu ruma.

Treinamentu ne’e tuir planu, hahú ohin no sei remata iha loron sesta feira agora hodi hetan formasaun no treinamentu avansadu nian.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here