Prezidente Institutu Nasionál Seguransa Sosiál (INSS), Longuinhos Armando. Imajen Tatoli/Egas Cristovão

DILI, 03 setembru 2020 (TATOLI)- Prezidente Administrasaun Institutu Seguransa Sosiál (INSS), Longuinhos Armando Leite informa, pagamentu ba idozu iha faze dahuluk tinan ne’e nian hela munisípiu rua mak seidauk finaliza no hein katak iha fin-de-setembru bele finaliza ona.

Tuir nia katak munisípiu rua ne’e, seidauk finaliza tanba Bobonaro iha postu ida mak iha suku 18 no distánsia dook malu entre suku ida ba suku seluk no RAEOA (Rejiaun Autonóma Espesiál Oe-cusse-Ambeno) seidauk tanba halo pagamentu tarde.

“Ita hela Bobonaro mak seidauk finaliza tanba iha postu ida mak iha suku hamutuk 18 no suku hela dook malu entaun ho ida ne’e ita-nia pagamentu ba idozu kleur uituan, maibé fiar katak iha fin setembru bele finaliza ona inklui RAEOA,” lider másimu INSS, Longuinhos Armando Leite, haktuir ba Agência TATOLI iha Caicoli, Dili, kinta ne’e.

Nia dehan pagamentu agora ne’e hamutuk rihun 100-resin, rihun 24 kansela ka pendente tanba laiha movimentu iha tinan uluk, entaun agora daudaun sai ne’e rihun 82 no hosi rihun 82 balun naran laiha.

Iha idozu balun halo hela tratamentu saúde iha rai-li’ur tanba moras no balun fali ba halimar ho família iha Inglatera mak mosu Covid-19 entaun sira labele simu sira-nia osan maibé osan hirak ne’e sei iha banku hela.

“Ita hein de’it bainhira sira iha karta deklarasaun hosi suku nian mai INSS mak foin bele simu sira-nia osan. Sira-nia direitu nafatin iha maibé tenke iha karta ne’ebé justifika katak nia sei moris,” Prezidente INSS ne’e dehan.

Notísia reevante:INSS haruka ona naran idozu 728 ba BNCTL

Jornalista : Osória Marques

Editór : Cancio Ximenes

HAKEREK NO HATÁN

Please enter your comment!
Please enter your name here