Administradór Munisípiu Covalima, Afonso Nogueira Nahak, Padre Sebastião Eugénio da Cruz Correia no Komandante Polisia Munisipiu Covalima Superintendente, António Maria de Sa, hamutuk ho povu kuaze rihun ida partisipa serimónia kari ai-funan iha Monumentu Masakre Setembru Negro 1999, Tersa (20/08/2019). Imajen/Eugénio Pereira

DILI, 03 setembru 2020 (TATOLI)–Asosiasaun Estudante Juventude Suai (AEJS) ho inisiativa hamutuk ho komunidade Suai realiza eventu Masakre Setembru Negro ne’ebé akontese iha Munisípiu Covalima, ba dala XXI (06/091999-2020) ho tema “La’o tuir martir sira-nia ain-fatin”, hodi valoriza martir sira-nia sakrífisiu ba libertasaun nasionál.

Xefe Komisaun Organizadora (KO), Osvaldo dos Santos Coli hateten, objetivu hosi komemorasaun ne’e oinsá atu valoriza martir sira-nia sakrifísiu ba libertasaun nasionál nian.

“Selebra maskre Setembru Negro 06/09/1999 ne’e objetivu dahuluk maka moto (lema) ne’ebé ami tau maka ‘La’o tuir martir sira-nia ain fatin atu liberta povu’, ne’e  katak uluk sira sakrifika sira-nia aan ho sofrimentu tomak  atu  liberta povu, ita-nia rai; entaun ami jerasaun foun no hanesan juventude no estudante Covalima nian kontinua atu tuir sira-nia dalan hodi liberta povu rai doben ida ne’e ba  oin,” Osvaldo dos Santos Coli dehan ba jornalista Agência TATOLI liuhosi telefone, kuarta ne’e.

Nia hatutan, atu liberta povu ida maka liuhosi komemorasaun 06 Setembru Negro oinsá atu valoriza martir sira-nia sakrifísiu maka, ba sofrimentu libertasaun sira tenke ida-idak iha nia istória ne’ebé tenke hakerek iha livru istória Timór nian.

Responsável KO ne’e tenik, iha eventu komemorasaun sei iha atividade animasaun maka hanesan, hahú hosi semináriu, halo reflesaun, loke filmajen masakre 06 Setembru 1999 nian, diskursu públiku ba estudante sira iha Covalima, halo animasaun ho konsertu ba kalan, sei hatudu drama kona-ba 06 Setembru Negro nian, kari ai-funan iha monumentu Masakre Setembru Negro Suai,  dansa kultura, no hananu inklui poézia.

Atividade eventu komemorasaun Setembru Negro ne’e hala’o tanba hanoin rasik hosi AEJS maka komisaun submete programa ba iha igreja no lidér munisípiu.

Kona-ba finanseira ba eventu ne’e nia dehan, hetan apoiu hosi governu liuhosi Prezidente Repúblika, Ministru  Asuntu Kombatente Libertasaun Nasionál (MAKLN), no hetan apoiu mós hosi lidér Karismátiku Kay Rala Xanan Gusmão.

“Ba atividade sira, ami hetan suporta hosi lidér munisípiu to’o lidér lokál, igreja. Alende ida ne’e, ami hetan mós hosi Governu liuhosi, Prezidente Repúblika, Ministru Asuntu Kombatente Libertasaun Nasionál, no hetan mós ajuda hosi Eis-prezidente Kay Rala Xanana Gusmão,

Ba oradór sira ne’ebé sei partisipa iha eventu komemorasaun Masakre Setembru Negro ne’e maka hosi Diretór Ezekutivu Centro Nasionál Chega (CNC) Hugo Maria Fernandes, Lidér Karismátiku Xanana, Amo Francisco Bareto, no hosi sobrevivente nain rua; Fres da Costa no Natália Gusmão. Nune’e mós partisipa másimu hosi lidér munisípiu to’o komunitáriu no komunidade tomak hosi Suai.

Notísia relevante:Setembru ne’e, CNC sei komemora eventu istóriku iha munisípiu rua

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here