Fronteira terrestre Mota-ain, Batugade, Imajen Tatoli/António Gonçalves

DILI, 03 setembru 2020 (TATOLI) — Bankada CNRT enkoraja Governu atu tau-matan ba fronteira entre Timor-Leste (TL) ho Repúblika Indonézia (RI) hodi prevene surtu propagasaun tama territóriu TL nian.

Bandeira partidu CNRT. Foto espesiál.

“Bankada CNRT kontinua enkoraja Governu atu tau-matan ba fronteira ho Indonézia, aumenta fasilidade, rekursu umanu no finanseiru ne’ebé adekuadu atu prevene Covid-19 tama mai iha Timor-Leste,” Reprezentante Bankada CNRT Deputadu Gabriel Soares, informa liuhosi deklarasaun polítika iha ámbitu diskusaun renovasaun deklarasaun Estadu Emerjénsia, iha plenária Parlamentu Nasionál, kinta ne’e..

“Ita-nia país labele moris ho Estadu Emerjénsia, ita lakohi aprende oinsá hamriik no hadiak ita-nia rain, enkuantu nasaun barak komesa halo hela esforsu maka’as hodi estabiliza sira-nia ekonomia iha sira-nia rain, mezmu la liuhosi dalan Estadu Emerjénsia nian,” nia reforsa.

Bankada CNRT husu governu presiza atu tau-matan ba pesoál hirak ne’ebé iha pontu entrada territóriu Timor-Leste, kompleta sira-nia fasilidade no subsídiu dignu ba pesoál Seguransa Sívil, PNTL no F-FDTL iha pontu entrada sira, funsionáriu alfandega, pesoál saúde, jornalista sira, bombeiru no cleaner services (pesoál limpeza) atu halo esforsu prevensaun tanba sira mak servisu maka’as deteta moras Covid-19.

Bankada CNRT aproveita oportunidade ida-ne’e atu agradese ba pesoál liña frente sira; profesionál saúde sira ne’ebé servisu maka’as hodi deteta, buka tuir no trata ita-nia maluk timor-oan sira ne’ebé pozitivu Covid-19.

“Ami mós hakarak agradese ba povu no sira-ne’ebé servisu hodi luta hasoru Covid-19. Ita-bo’ot sira-nia esforsu no servisu maka’as ajuda tebes Timor-Leste hodi evita moras ne’e da’et iha komunidade, no liu-liu la lori mate ba ita-nia komunidade,” Deputadu Gabriel Soares dehan.

Maibé Bankada CNRT Konsidera aplikasaun Estadu Emerjénsia, iha ámbitu pandemia Covid-19 ne’e, sai tiha instrumentu polítika hodi asegura de’it ukun.

“Timor-Leste tenke ba oin, maibé tenke liuhosi dalan, tuir Konstituisaun RDTL no regra demokrasia universál. Atu Timor-Leste ba oin, partidu sira labele kahur interese polítika partidária nian iha Administrasaun Públika, liu-liu iha Estadu Direitu Demokrátiku, funsionáriu estadu nian labele sai fali ajente partidu polítika nian hanesan iha nasaun sira ne’ebé opta sistema uni-partidáriu,” Deputadu Gabriel Soares hateten.

Bankada CNRT haree katak, Prezidente-Repúblika lakohi fó podér ba Primeiru-Ministru, no mós PR hatudu laiha konfiansa ba Governu.

“Ami triste haree situasaun ida-ne’e tanba úniku país ne’ebé mak rezolve Covid-19 ho EE até que to’o dala-lima ona. Ita hanesan fali laiha ona dalan legál seluk,” reprezentante povu ne’e dehan.

Notísia relevante:PN autoriza Prezidente-Repúblika dekreta EE dalima

Jornalista: Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here