Prezidente KKLN, Vidal de Jesus 'Riak Leman’. Imajen Tatoli/António Gonçalves

DILI, 03 setembru 2020 (TATOLI)–  Konsellu Kombatente Libertasaun Nasionál (CCLN, sigla portugés) apela ba veteranu kombatente libertasaun nasionál, órgaun rezisténsia ho jerasaun patriota sira no sosiedade sira iha Timor-Leste atu tuur hakmatek kontribui paz no estabilidade polítika iha Timor-Leste.

Notísia Relevante : Jenerál Lere nia intervensaun halo RNDJK adia “manifestasaun”

Tuir dekretu lei númeru 7/2018, 20 marsu, CCLN nu’udar órgaun úniku ho podér públiku ne’ebé reprezentante kombatente hotu- hotu iha territóriu  nasionál hanesan “NAIN BA UKUN AAN no RAIN BA NASAUN” kaer metin ninia papél hodi koopera ho Estadu no Governu Timor artigu 5  alínea B kona-ba paz no estabilidade sosiál país nian no artigu 6 pontu 1 alínea 1 kona-ba seguransa ho defeza nasionál ho ne’e apela ba veteranu, kombatente libertasaun nasionál, órgaun rezistensia ho jerasaun patriota hotu hodi tuur hamatek.

Prezidente CCLN, Vidal de Jesus “Riak Leman” konsidera asaun pasífiku ne’ebé organiza husi grupu rua hanesan “Paz e Responsabilidade” ne’ebé lidera hosi António Aitahan Matak no Grupu Rezisténsia Nasionál Defende Justisa no Konstituisaun RDTL” ne’ebé lidera husi Angela Freitas, la reprezenta veteranu sira iha Timor-Leste hodi halo asaun atu kontra  Prezidente Repúblika, Francisco Guterres Lú Olo.

“Hametin unidade nasionál iha ita nia leet hanesan uluk iha tempu rezisténsia nasionál. Atu nune’e, ita labele monu ba propaganda polítika ema individuál ka grupu seluk nian,” Riak Leman hateten  ba jornalista liuhusi konferénsia imprensa, ohin, iha sede CCLN, Matadouru, Dili.

Nia dehan, iha periodu fiskál tinan ne’e, Estadu seidauk iha Orsamentu Jerál Estadu (OJE) atu hala’o dezenvolvimentu nasionál, tanba impase polítika ne’ebé Timor-Leste enfrenta daudaun,  maibé CCLN fiar katak, iha tempu badak nia laran Parlamentu Nasionál sei debate OJE 2020, tanba ne’e nu’udar veteranu ho Kombatente Libertasaun Nasionál husu ba sosiedade hotu-hotu koopera ho Estadu hodi asegura paz no situasaun hakmatek.

Veteranu rezisténsia ne’e dehan, hanesan sidadaun ida, ema hotu- hotu iha direitu ba liberdade espresaun tuir artigu 40 Konstituisaun RDTL, maibé iha mós obrigasaun hodi kontribuisaun ba defeza soberana no integridade territorial tuir artigu 49 ema hotu iha lei inan ne’e rasik, bainhira estadu no nasaun hasoru ameasa internal no external.

Jornalista   : Eugénio Pereira /Joanico de Araújo

Editór        : Francisco Simões

HAKEREK NO HATÁN

Please enter your comment!
Please enter your name here