Hakerek nain, Rafael Ximenes de A. Belo.

“Profesionalizmu ne’e atitude, valór no kualidade ema idaidak nian hodi hala’o knaar ida, asume responsabilidade ida (formál ka naun-formál)”.

Husi:

Rafael Ximenes de A. Belo

Antesedente

La sai ona novidade iha “disionáriu mídia” nian liafuan dijitál. Prezensa dijitalizasaun iha era internet ne’e dudu mídia konvensionál (jornál, rádiu no televizaun) atu re-pensar (hanoin) no reformula ninia polítika redasaun no editoriál, oinsá fornese informasaun ba públiku, nune’e mós polítika ka planu negósiu oinsá garante nia ezisténsia no sobrevivénsia iha sosiedade mídia ida ne’ebé eterojéneu no kompetetivu ne’e.

Loos duni, hanesan ita hotu hatene prezensa mídia iha Timor-Leste la’ós foin iha tempu independénsia nian maibé hahú kedas iha vijénsia kolonializasaun, okupasaun no mós períodu tranzisaun ne’ebé lidera husi Organizasaun Nasaun Unida ba Tranzisaun Administrasaun iha Timor-Leste (UNTAET, sigla inglés). Maibé, iha sékulu XXI hafoin deskobrimentu internet no expansaun rede internet liuhusi fibra ótika, kanál no mós aparellu komunikasaun hanesan telefone rezulta mós migrasaun audiénsia sira ba asesu informasaun. Katak, husik hela regularmente mídia klásiku (konvensionál) ba mídia kontamporaneu (dijitál).

Rezultadu husi prosesu ida ne’e implika mós mekanizmu oinsá asesu produtu jornalístiku husi audiénsia sira, tanba plataforma ne’ebé mak diferente entre mídia rua. Inklui, dimensaun entre mídia rua ne’e rasik tanba ida iha fleksibilidade lori ka movel ba mai iha ne’ebé de’it importante iha ekraun ho aplikasaun internet no pakote (saldo) hodi bele absorve informasaun sira ho formatu saida de’it ho lais no konverjente, seluk labele halo ida ne’e.

Hanesan faktu inegavel ida, iha dékada ikus ne’e, ho prezensa internet, esperiénsia balun hatudu katak iha mikrolete ka bus (auto-carro) laran ita laduun ona haree ema lori jornál lee. Iha, maibé ita hetan hanesan ko-insidente de’it. Nune’e ita bele nota katak bele prejúdika mós ezisténsia no sobrevivénsia mídia imprensa sira, hanesan mós mídia elektrónika; kultura asiste programa televizivu ka rona hamutuk kuaze la sai ona tradisaun ida iha sosiedade tanba telemovel ki’ik ida bele akumula informasaun hotu iha nia plataforma. Triste maibé ne’e mak fenómeno foun ida iha ita-nia realidade.

Biar nune’e, prezensa mídia online ka mídia dijitál (cybermedia) sira tanba internet mós iha dezafiu no konsekuénsia rasik tanba fatór kompetitividade; iha aspetu konteúdu (informasaun ka entretenimentu), kustu (kapital), segmentu merkadu, audiénsia no reputasaun. Ema ne’ebé ohin loron manten iha indústria mídia, tenke halo ezersísiu barak liután oinsá bele hadook aan husi prejuízu no konsekuénsia sira. Nune’e mós, favoritu ba negósiu mídia inkluzivamente konvensionál la sai ona preferénsia ema barak nian tanba la fásil hanesan ko’alia.

Iha Timor-Leste, entre gosta ka la gosta, ita tenke rekoñese no apresia timoroan sira balun maske ho dezafiu oioin iha era dijitál ida ne’e maibé “hamriik metin” nafatin hodi reziste no kria oportunidade ba timoroan seluk, fó espasu ba timoroan seluk hodi espresa sira-nia abilidade jornalístika, inklui mós administrativu.

Iha situasaun ida ne’e, ohin loron, ema ne’ebé iha korajen no brani foti risku no investe iha indústria mídia, ema determinadu de’it tanba la ejize de’it estratéjia maibé kapasidade (téknika no finanseira) hodi garante operasionalizasaun. Nune’e mós, ho prezensa internet ema bele kria plataforma oioin maibé iha mós nia problema rasik, hodi garante nia sobrevivénsia no ezisténsia inklui oinsá manten nia audiénsia sira. Mídia sein audiénsia, audiénsia sein públiku alvu ne’e sai dezafiu ida. Entaun pergunta, saida mak mídia sira ne’e tenke halo hodi manten nia audiénsia sira? No, saida mak órgaun komunikasaun sosiál sira presiza elabora hodi kontinua eziste?

Hatán ba lia-mahusu sira ne’e, liuhusi artigu ida ne’e, hakerek-na’in fundamenta ba hanoin husi akadémiku, jornalista, eskritór, novelista no kolumnista, As Haris Sumadiria (2008:46) kona-ba oinsá “hametin ai-rin” indústria mídia, ne’ebé hanaran “Trindade”, hanesan Idealizmu, Komersializmu no Profisionalizmu,  hodi sai nu’udar “bukae-oan” ida, nu’udar “matak-malirin” ida ba interresadu mídia sira, hodi bele tau iha konsiderasaun bainhira hakarak estabelese órgaun mídia (konvensionál ka online) iha kontestu Timor-Leste nian, liuliu iha era dijitalizasaun atuál ne’e.

Hakerek-na’in hakarak partilla koñesimentu sira ne’e tanba hanesan Santa Teresa de Calcutá (26 agostu 1910 – 5 setembru 1997) dehan: “As mãos que ajudam são mais sagradas que os lábios que rezam”. Tanba ne’e, liuhusi obra eskrita ida ne’e, hakerek-na’in hakarak partilla mós ba belun ka maluk sani-na’in sira (bele konkorda ka diskorda) ita asesu hamutuk hodi kontribui kognitivamente, motoriku no afetivu ba ita idaidak nia aan rasik, individualmente.

Enkuadramentu teóriku

Idealizmu

Idealizmu ne’e iha definisaun denotativa no konotativa. Denotativamente (etimolojia) ka sentidu literál, idealizmu ne’e mai husi dalen gregu “ide” ka “ideia” ne’ebé signifika hanoin puru. Nune’e mós, idealizmu (idealism) is the belief that our our ideas are the only things that are real and that we can know about (Oxford Advanced Learner’s Dictionary, 2005: 755).

Konotativamente, tuir Sumadiria (2008:46), idealizmu (idealisme) ne’e: mehi, obsesaun, buat ida ne’ebé kontinua duni tuir atu bele to’o ho esforsu oioin no maneira ne’ebé haloos tuir étika no profisaun ne’ebé vigora inklui rekoñesidu husi sosiedade no nasaun.

Ho hanoin sira ne’e, empreza mídia sira mós presiza define nia ideolojia, hanesan komunga valór no prinsípiu demokrasia sira, direitu umanu, lia-loos, pás, justisa, igualidade no ekidade, inkluzaun no seluktan. Hirak ne’e, nu’udar ezemplu balun ne’ebé instituisaun mídia bele konsidera hodi luta no kontinua luta nafatin iha nia ezisténsia hodi presta informasaun, iha ámbitu formasaun opiniaun no karakter sidadaun no nasaun nian.

Iha Timor-Leste, iha lei Komunikasaun Sosiál, iha artigu 3o (Knaar komunikasaun sosiál nian) no artigu 4o (Dever sira komunikasaun sosiál nian). Iha artigu rua ne’e ko’alia klaru kona-ba “knaar no dever” sira ne’ebé órgaun komunikasaun sosiál sira, tantu mídia imprensa, elektróniku no online sira banati. Mídia sein idealizmu sei influénsia ba nia kredibilidade no integridade institusionál ba se de’it ka perante públiku.

Tanba ne’e mídia ho idealizmu sei lais ka kleur, públiku sei “hanai”, nia reputasaun neineik ka lalais sei la sai dúvida iha opiniaun, observasaun no avalisaun públiku nian nu’udar parseiru prinsipál ba mídia sira.

Komersializmu

Idealizmu la iha komersializmu ne’e hanesan iluzaun (mehi). Razaun, idealizmu tenke fundamenta ho komersializmu atu nune’e bele garante mídia nia ezisténsia no sobrevivénsia, tantu instituisaun no mós rekursu umanu sira, liliu iha nesesidade primária no sekundária sira. Tanba ne’e, iha ámbitu jestaun mídia, alende iha jestaun notísia (buka notísia no prodús notísia) iha mós jestaun empreza ka instituisaun (publisidade, promosaun, rekursu umanu, rekursu materiál).

Esensiál no pertinente, iha kontestu ida ne’e, mak mídia iha obrigasaun atu evita ka hasees aan husi tentativa “poder polítiku no poder ekonómiku” hodi bele garante nia independénsia editoriál no redasaun hodi presta nia serbisu ba públiku tuir nia vizaun, misaun no objetivu ne’e mak iha no prinsípiu, valór no norma universál jornalizmu nian ne’ebé pratikante komunikasaun sosiál sira komunga no adota iha ezersísu sira-nia profisaun.

Profesionalizmu

Profesionalizmu ne’e atitude, valór no kualidade ema idaidak nian hodi hala’o knaar ida, asume responsabilidade ida (formál ka naun-formál). Iha péritu barak mak halo definisaun no interpretasaun kona-ba profisionalizmu ne’e maibé, tuir hakerek-na’in profisionalizmu ne’e “lalatak” husi kompeténsia (koñesimentu no abilidade).

Iha tempu dijitál ne’e, kompetisaun entre individuál efetivu, dinámiku no mós iha fluksu ne’ebé maka’as iha aspetu oioin, tanba ne’e individu idaidak obrigadu no komprometidu atu eleva no promove kualidade pesoál ne’ebé orienta no ajusta ba kompeténsia hodi determina ninia profesionalizmu para bele alkansa susesu ruma, atinje meta ruma, to’o faze determinada ruma ne’ebé mak definida, liuhusi kria oportunidade rasik ka aproveita oportunidade ne’ebé kria husi individuál ka grupu seluk, iha natureza mídia nian.

Iha aspetu ida ne’e, instituisaun mídia sira tenke investe ba iha kualidade rekursu umanu no materiál, traballadór sira ne’ebé mak haknaar aan iha órgaun komunikasaun sosiál sira mós iha obrigasaun halo auto-investimentu hodi bele sai kompetente: iha koñesimentu (jerál no espesífiku), kapasidade (tékniku no análize) no konsiénsia (sensibilidade) hodi prienxe rekizitu profisionalizmu nian, sein ignora responsabilidade rasik.

Bazea ba enkuadramentu teóriku no interpretasaun husi artigu ne’e, hakerek-na’in  halo sínteze ida katak idealizmu, komersializmu no profisionál ne’e mak “ai-rin” ka “ai-tonka” hodi tane mídia. Indústria mídia bainhira la iha “ai-rin” ka “ai-tonka” sira ne’e sei lakon ka la iha kbiit hasoru “laloran ka anin boot” hodi projeta nia vizaun iha misaun ba oin hodi alkansa nia OBJETIVU. Ho nune’e, eskala númeru estatístika dezempregu mós sei multiplika.*

“Media forte, demokrasia garantida.

Mai ita promove liberdade ho responsabilidade liuhusi respeitu malu. Krítika maibé krítiku, ita ajuda forma karakter sidadaun no nasaun!

Bibliografia:

  1. Deuter, Margaret, et.all (2015). Oxford Advanced Learner’s Dictionary, ninth edition, p.755;
  2. Junaedi, Fajar (2014). Manajement Media Massa, Teori, Aplikasi dan Riset, Mata Pandi Priset, Yogyakarta, Edisi Pertama, hal.51
  3. Lei Komunikasaun Sosiál (2016), 3o Edição, fevereiro;
  4. Sumadiria, As Haris (2008). Jornalistik Indonesia, Menulis Berita dan Feature: Panduan Praktis Jurnalis Profisional, p.46;

 

Hakerek nain nu’udar Alumni Departamentu Komunikasaun Sosiál, UNTL.

E-mail:rafael.enf009@gmail.com

Facebook: Rafy Belo ATL

Nota: Artigu opiniaun ne’e responsabilidade pesoál nu’udar sidadaun ida hodi ezerse nia direitu ba liberdade imprensa no ko’alia, ne’ebé konsagra mós iha Konstituisaun Repúblika Demokrátika Timor-Leste!

HAKEREK NO HATÁN

Please enter your comment!
Please enter your name here