Suspeitu ho inisial CBM (klaran) ne'ebé simu droga sabu-sabu kilograma 3,253 bainhira Polisia Kriminal aprezenta ba publiku iha konferensia imprensa iha Kuartel Jeral PNTL, Caicoli, Dili, 16 janeiru 2020. Imajen/Dok. Tatoli

DILI, 02 setembru 2020 (TATOLI)-Tribunál Distritál Dili (TDD), ohin, kontinua rona sasin ka testemuña sira ba kazu tráfiku ilísitu ba droga, ne’ebé deskonfia komete hisi arguidu CMB.

Notísia Relevante : Autoridade Detein Timoroan Lori Sabu-Sabu Kilograma 3,253

Arguidu CMB  simu pakote sasán hanesan Kompresór AC karreta nian (tau droga iha laran) husi sidadaun ida husi Nijéria ho inisiál VCO, iha tinan 2019.

Tuir akuzasaun husi Ministériu Públiku (MP)  katak, arguidu CMB, iha agostu 2012 to’o 14 janeiru 2020, serbisu iha Timor Plaza iha andár-lima (5) nu’udar resepsionista ho vensimentu $350.

Iha loron 14 janeiru 2020, purvolta  tuku 12:00 Otl, PNTL simu informasaun katak, iha importasaun sasán mákina dinamon kompresór AC karreta uzadu deskonfia mákina X-Raiu deskobre iha buat ruma iha laran no Autoridade Alfándega prende hela iha Aeroportu Internasionál Prezidente Nicolau Lobato.

Iha loron refere Polísia hamutuk ho arguidu CMB loke kaixa ne’ebé importa husi Nijéria enkontra sasán ho tipu dinamon kompresór ba AC karreta, maibé uzadu no fo’er.

Kompresór AC nia matan modifika ka solda hodi tau droga iha laran, maibé kuandu loke husi parafuzu la enkontru buat ruma, tanba solda metin, no kuandu hasai tiha nia matan iha laran enkontra droga.

Sasán kompresór AC karreta uzadu, haruka husi Sidade Lagos, Nijéria, iha loron 17 dezembru 2019, liuhusi   Reinu Unidu, atravesa husi ajénsia Worldwide Limited ba iha Reinu Unidu através ajénsia Viva Xpress Logistics C/O YLC, Galleymead Road Colnrook SL3 OEN (UK) hafoin, sasán refere iha loron 27  dezembru 2019 to’o iha Singapura, no iha loron 29 dezembru 2019, sasán refere husi Singapura to’o iha Bali-Indonézia, no iha loron tuir mai  (30  dezembru 2019) sasán refere husi Bali-Indonézia to’o iha destinu final Timor-Leste ho Aviaun Citilik QG-500, iha Aeroportu Prezidente Nicolau Lobato, kompañia STAT mak hatún kargu refere husi aviaun no ajénsia ne’ebé trata desalfandega iha Timor-Leste mak DHL Expres Unipessoal Lda, dokumentu ba importasaun refere ho DAU C.

Na’in ba kaixa importasaun refere identifikadu ho arguidu CMB ho nia rezidénsia Prezidente Nicolau Lobato, Comoro, Dili, Timor-Leste, Timor Plaza Hotel AT 5 Flor, Postal 600, nu’udar na’in ba sasán refere, ema ne’ebé importa mai ho inisiál  VCO.

Iha loron 07 janeiru 2020, sasán refere sai husi ajénsia STAT, bainhira X-Raiu hetan katak, iha kaixa laran hanesan iha besi no laran mamuk nomos iha kór mutin, no sasán fo’er no uzada, hodi nune’e parte Alfándega prende sasán refere hodi haruka ajénsia DHL halo kontaktu ba iha arguidu CMB, hodi ba iha Aeroportu hodi loke sasán refere iha nia oin.

iha loron 7 janeiru 2020, arguidu mós simu osan ho montante $600,00 transfere husi Nijéria liuhusi Wester Union iha Colmera-Dili, ema ne’ebé maka transfere osan ba arguidu ho naran inisiál UCA, arguidu halo levantamentu iha loron ne’e kedan.

Iha loron 8 janeiru 2020 iha dadeer DHL informa ba arguidu atu ba iha Aeroportu Internasionál Prezidente Nicolau Lobato hodi foti sasán, tanba autoridade Alfándega deskonfia no halo apreensaun, Alfándega haruka arguidu rasik mak loke uza xafenda, maibé la konsege loke tanba parafuzu dol.

Iha loron refere autoridade Alfándega husu arguidu atu buka téknika ruma hodi loke kompresór refere iha Aeroporto Prezidente Nicolau Lobato, antes lori sasán sai, no arguidu fila ba nia uma hodi buka téknika.

Iha loron 09 janeiru 2020, tuku 12:51 Otl, arguidu CMB simu mensajen voice husi VCO dehan, “Ita boot rezolve hamutuk ho sira, hafoin ita-boot rezolve ona ho sira no ita-boot dehan ba sira katak, ita-boot laiha mekániku ruma iha Timor-Leste, mekániku loloos mak ema ida iha Xina, karik la ba agora, entaun ita-boot haree hanesan iha buat ruma iha ne’ebá, no sira hanoin katak ita-boot atu halai sees, entaun sira sei buka o, ha’u hatene katak ita-boot presiza ba ne’ebá agora sira hein hela o”.

Iha loron 09 janeiru 2020, arguidu CMB fila ba aeroportu hodi hasoru autoridade Alfándega hodi dehan nia laiha téknika hodi loke kompresór refere.

Hahú husi loron 10 to’o 13 janeiru 2020, autoridade Alfándega através  ajénsia DHL ho naran Zebideu halo kontaktu ba iha arguidu maibé arguidu la kolabora.

Hodi nune’e iha loron 14   janeiru tinan 2020, tuku 17:00 Otl, hodi halo kapturasaun ba arguidu no iha prezensa arguidu nian hodi loke mákina kompresór AC karreta nia laran Poo mutin kristál nakonu iha kompresór laran.

Poo mutin refere submete ba NIC test rezulta pozitivu droga ho tipu methamphetamine ka koñesidu ho droga sabu-sabu ho todan brutu 3.253 kg.

Polísia imediatu halo apreensaun ba droga sabu-sabu ho todan brutu 3.253 kg, pakote mákina AC, telefone marka OPPO F11-pro kór metan, sim card no pasaporte.

Arguidu koñese VCO iha setembru 2019 através Facebook no konversa mós liuhusi WhatsApp.

Durante sasán refere seidauk to’o iha Timor-Leste, VCO haruka mensajen voice hodi konversa kona-ba importasaun sasán no mós kona-ba ema iha Indonézia atu haruka osan liuhusi arguidu nia konta bankária no mós kona-ba arranja mala no mós simu pakote uzadu refere.

Tipu droga methamphetamine ka koñesidu ho droga sabu-sabu tama iha tabela II B iha lei númeru 2/2017, 25  janeiru, lei kombate tráfiku ilísitu droga, konsidera krime.

Mézmu hanesan ne’e, arguidu rasik hatene katak iha droga iha kompresór AC nia laran, maibé arguidu lakohi ko’alia sai ba iha autoridade Alfándega tanba ne’e arguidu kontinua nonook.

Droga ho tipu methamphetamine ka mais koñesidu ho droga sabu-sabu ho todan brutu 3.253 kg, arguidu importa husi Nijéria. Arguidu hetan ba nia vensimentu ho montante $600,00 ba serbisu ne’ebé maka nia hala’o ho ema Nijéria, osan refere agora rai hela iha arguidu nia uma.

Arguidu CMB hamutuk ho trafikante droga husi nasaun Nijéria hodi importa droga ho tipu methamphetamine ka mais koñesidu ho droga sabu-sabu ho todan brutu 3.253 kg, hodi tama mai Timor-Leste.

Arguidu hala’o atividade kriminoza organizada iha ámbitu internasionál. Arguidu hatene di’ak katak, sasán ne’ebé importa ne’e droga no kontra lei no mós bele hetan kastigu, maibé arguidu hakarak hetan ba nia benefísiu ilejítimu ba nia-aan no prejudika Estadu Timor-Leste hodi hamutuk ho grupu organizadu no trans nasionál hodi importa droga refere tama iha Timor-Leste.

Ho nune’e arguidu CMB, hanesan autór materiál ba prátika krime ida tráfiku atividade ilísita previstu no punidu iha artigu 7 númeru 1 no artigu 9 kona-ba agravadu husi lei númeru  2/2017  25 janeiru, lei kona-ba kombate tráfiku ilísitu ba droga.

Liu husi audiénsia julgamentu ne’e sasin nain rua ho inisiál MB no GMP  nu’udar membru PNTL husi  unidade seksaun investigasaun kriminál ba Narkotika hatete, momentu ne’ebá hafoin simu informasaun husi parte Alfándega no intelijénsia iha aeroportu sira-nia parte tun ba iha terrenu hodi halo identifikasaun.

Sasin sira haktuir katak, kompresór AC karreta ne’e rasik iha aeroportu parte sira  tenta atu loke, maibé ladi’ak tanba falun metin, ho nune’e, iha loron tuir mai parte PNTL lori objetu refere ba iha unidade komandu nasionál PNTL iha Caicoli, Dili, ho meius ne’ebé arranja husi mekániku parte polísia nian lori ‘gurinda’ hodi ko’a sai  ho prezensa parte sira hanesan Alfándega, ekipa investigasaun no arguidu rasik identifika plástiku mean ne’ebé falun ho objetu iha kompensór nia laran.

Sasin dehan, nune’e sira-nia parte lori amostra husi objetu  ne’e hodi halo screening teste uza mitolojia rua hanesan haree nia substánsia color ho todan, iha rezultadu teste hatudu pozitivu katak substánsia  narkótika kímiku ne’ebé bainhira ema konsumu fó perigu ba ema nia saúde.

Prosesu julgamentu ne’e prezide husi juiz koletivu, Evangelino Belo, Maria Solana, Afonso Carmona no  Ministériu Públiku reprezenta husi prokuradór Luis Hernánio Rangel no Lídia Soares, arguidu hetan asisténsia legál husi advogadu privadu  Fernando da Costa.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here